喺選擇器材第四篇講箭時有輕輕提到箭尾。奧運時慣常都會留意一吓運動員用嘅器材，特別係箭，因為都幾難睇到所以更加想知。襯比賽剛剛完結又再講多少少箭尾，但主要只係圍繞Easton X10，因為無論你從初學開始慢慢進步，過程中選用咩箭，到最後反曲弓打70米終點都係打X10，咁多年黎都無咩產品可以同佢有得比，無咩人會選用其他箭。而X10嘅箭尾選擇亦都唔多，由於箭桿內徑幼，用唔到insert nock，咁所以選擇只係outsert nock或者各款pin nock。
Outsert Nock / Overnock / Out-Nock
X10最常見到人用係Beiter out-nock，無8成都7成射手奧運射手用（其實我覺得舊時係超過9成），韓國隊咁多年黎都係用out-nock無變過，咁所以跟住用正常情況應該無咩問題。但用out-nock要留意佢比較長，同用pin nock比較佢會令整支箭長1分半或者大約4-5mm左右，唔好睇少呢丁屎咁多，呢個會令箭動態撓度表現得比較軟，差別雖然唔大但會有明顯影響。
另外如果射手拉距短就要計數，睇吓揀用out-nock會唔會要cut箭cut得太短。Cut短過廠商建議長度，箭桿外徑有機會開始變粗，咁箭外徑就會開始粗過箭頭，容易損耗。當然箭頭長度亦都有好大影響，特別係X10嘅stainless steel break-off point又係鬼死咁長，有成1寸。撓度型號例如750、700同650等嘅X10，箭桿出廠買番黎時都同樣係29寸長，最多可以cut 3.5寸，假設用長箭頭同out-nock，扣埋箭頭箭尾箭最短都會有大約27寸（29-3.5+1+0.5），未必個個人啱用。
Beiter out-nock而另一個長嘅位係包住箭尾部份，架埋箭尾突出去部份有成26mm，因為太長，所以通常都會見到用out nock嘅射手箭毛要癡到貼實箭尾，否則好似上圖中箭毛咁就會太前唔喺一個理想位置。
咁除咗Beiter嘅out-nock，有無其他outsert nock可以揀？其實係有嘅，例如Easton自己都有出overnock，不過唔見有人用，起碼於奧運我見唔到。如果有番咁上吓箭齡，你會發現其實佢就好似係Beman Carbon Flash嘅out-nock。我估計呢款箭尾物料太淋，容易變形唔準確，所以無人用。
Pin Nock
Out-nock以外嘅選擇就係各款pin nock（防打釘箭尾），Beiter或者其他牌子都有。Pin nock有條pin（尾釘）係唔係保護性強啲無咁易打爆箭尾我有保留，我覺得要爆嘅一樣係會爆，直接將條pin推入箭桿爆到成朵花咁都有見過。可能打崩條pin時箭桿無爆觀感上令人覺得係條pin做到嘢，保護到支箭桿，如果呢個信念令到你感覺良好，我又覺得選用pin nock無壞。
有講法使用pin nock都係插入式，所以力量能夠充份傳到箭上，而且正確性較高。呢點一般人應該難以驗証，都係講個信字，但觀乎—眾頂尖射手都在用out-nock，咁即使out-nock無比pin nock優勝，都絕對無影響表現。而pin nock傳遞力量較準較正確呢一個係有前設，係假定箭尾做得完美精準，但pin nock往往就係品質控制做得比較差嘅一款，後面再講。
Pin nock選擇比較多，Beiter有款叫Pin-Out nock，除咗套入條pin仲有一圈包住箭桿。而印像中台灣亦都有特製過pin畀X10用，粒尾釘比平時pin nock嘅pin細，裝上之後依然可以使用out-nock，目的係保護定加重，或者兩者階是我就唔清楚。不過呢個特製尾釘外面用嘅依舊係一般out-nock，所以只算做out-nock嘅外掛而唔係pin nock。
仲係選擇唔到用ousert nock定pin nock，有人會考慮重量，驚pin nock多條pin重咗，確實pin加pin nock係重過out-nock，但影響唔算好大，我認為呢個唔會係主要考慮。
顏色
顏色先分做實色或者螢光色較容易比較，當中螢光色較實色多人用，因為上靶後較容易通過望遠鏡見到，但呢個並唔係唯一關於顏色嘅考慮。當重覆炒箭但又未打爆時，箭尾會出現裂紋，螢光色箭尾較清晰易見，但實色就比較難發現裂紋，而裂紋有時會出現喺箭尾內側，實色就無辦法發現到。最理想係每次比賽換全新箭尾打，咁爛唔爛裂紋容唔容易見到就無咁大影響。
有感覺螢光色比較脆，實色相對比較淋，令到會覺得螢光色較容易打裂，不過呢個好難客觀地做比較，而且亦都唔覺得顏色對箭群集中度同表現有任何影響。
箭尾槽 Nock Groove / String Groove / Nockbed
大細兩款箭尾槽反曲弓都有人用，最基本就係弦粗用大槽弦幼用細槽，但我哋必需要再精準一啲，因為箭尾槽夾落條弦度嘅鬆緊影響好大，而且箭尾槽唔係只有大細分，單係講Easton同Beiter兩個牌子，箭尾槽尺寸由細到大係：
Easton SM < Beiter #1 < Easton LG < Beiter #2
其實Beiter仲有#3 extra large，不過未見過實物亦都唔清楚咩時候會用到。
咁如果換箭尾例如由Easton SM轉用 Beiter #1會唔會過鬆要再織過護弦繩？因為大家都係細尺寸時差距並唔係非常大，所以需要視乎原本弦有幾粗上箭有幾實，講唔實有無必要。而如果同其他牌子比較，亦都再會有分別，甚至同牌子款式唔同嘅箭尾，因為形狀唔同，鬆緊度亦都會有差異。
檢查同判斷搭箭鬆緊度是否合適嘅方法，我已知並常用嘅有三個，三個都要做，並唔係隨便揀一個做就算：
1) 搭箭後弓指向地面令箭垂直向地面，用一隻手指輕力打落弓弦，箭應該要被彈走，如果彈唔走仲扣喺弓弦上面即表示太緊；
2) 搭箭在中央護弦繩上搭箭點以外嘅地方，用手輕推箭時箭可以喺弓弦上順暢地移黎移去，推唔郁或者郁得唔順即太緊，相反唔洗畀力佢都已經自己跣黎跣去即太鬆；（當然呢度有個前設，就係條弦護弦繩要織得好）
3) 搭箭於搭箭點上，箭唔應該有虛位可以被順時針逆時針扭動，如果扭得郁即表示太鬆。
另一個箭尾槽比較特別嘅位係Beiter箭尾嘅asymmetric形狀，即上面斜邊較平下面斜邊角度較大，設計原意係反曲弓扣弦開弓後弓弦會成角度，咁個箭尾形狀就係配合弦而成。聽落無問題，但我射咁多年，反反覆覆都有試用過Beiter out-nock唔少次，箭始終都無使用其他箭尾時飛得靚。不論係用out-nock好或者用pin nock好只要係Beiter，出箭時箭尾總會擺一擺，但用其他nock就無呢個問題，我懷疑都係同呢個asymmetric形狀有關。當然，問題根源應該係出於我手，可能係我撒放唔靚、手指扣弦力量分佈唔好所至，加上個asymmetric形狀先出事，但只要唔用Beiter nock就無問題，所以我都係唔揀佢，更加無辨法射out-nock。
品質控制
講咗啲理論嘢，都要考慮埋實際情況，要睇吓箭尾嘅品質控制，唔好假設每一粒箭尾都係一樣形狀，而且並唔係所有大牌子都做得好好，有啲更加係比老翻質素更參差。
箭尾品質非常重要，因為有啲做得唔好嘅箭尾歪埋一邊，即係話發射時弓弦畀力支箭時根本無可能推得直，即便動作做到完全一致，箭都只會被推歪，所以正在使用中嘅箭尾要不時簽查，全新開箱嘅箭尾更加必需要檢查，見到做功差劣唔直嘅箭尾可能要直接棄置。
最容易睇當然係裝上箭桿後睇吓有無歪埋一邊，而好多時歪埋一邊嘅原因係黎自底部，底部外壁厚薄唔均衡係成日都見到嘅問題。
保護性
如果要我唔科學地排邊款箭尾保護性最強，我會揀out-nock，雖然佢只係一舊膠，同有金屬pin比較好似比較弱，但佢都有一定能力將炒埋去嘅箭彈開，而好處係即使炒箭，除非打中完個箭尾都仲繼續直飛埋去箭桿，否則撞擊力係唔會傳落箭桿度，因為成粒箭尾都只係包住箭桿。相反任何pin nock或者insert nock，只要一炒箭，撞擊力就或多或少都會傳去箭桿，即係傷箭爛箭機會更大。
排out-nock之後係pin nock，雖然條金屬pin好似好保護，但好多時打中金屬pin嘅力量都會推條pin入箭桿照樣打爆，炒中pin會唔會推爆埋箭桿都係睇運氣。
如果真係要將箭桿尾保護得好啲，喺pin之前再加條collar係唔錯嘅選擇，呢個真實係有保護功效唔只係觀感上，試過唔只一次炒爆箭尾條pin崩晒，但箭桿尾都無爆開，正常條pin如果炒到正爛晒，箭桿都係一齊報消。但用collar會有另一個問題，collar係保護到箭桿尾，但撞擊力繼續傳入箭桿，可能箭尾唔爆但變成箭桿中間爆開，位置通常會係癡箭毛咁上吓，因為箭毛遮住唔容易睇到，需要留意多加檢查。
最弱我會覺得係任何insert nock，包括in-out nock。
其他事項
X10以外其他箭要用outsert nock有時會比較麻煩，特別係全碳箭本身就未必會同一款式箭所有撓度(spine)做到外徑一粗幼一致，即係話先搞清楚特定撓度箭桿外徑幾粗然後再去搵直徑合適嘅箭尾。Beiter好好本身已經有個列表講明咩型號out-nock配合咩箭尾。有時會發現無辦法喺個表度搵到個別牌子款式嘅箭，呢個未必係因為牌子款式唔普級或者Beiter漏咗，而有可能因為本身嗰隻箭嘅外徑做得唔準，有機會入唔到，咁就情願唔亂咁話啱用。
如果outsert nock差少少有啲鬆，可以用水喉膠布Teflon tape去補位迫實粒箭尾。
亦有聽過人搵條頭鬆去攝，呢個我唔建議，因為用頭髮或者線攝位只會攝到一邊，咁變相即係將粒箭尾推埋一邊偏離開中間。
按：有讀者提供第三個方法，就係用保鮮紙。即刻去試一試，我覺得呢個方法仲好過用水喉膠布，因為保鮮紙延展性比較高，容易拉得更薄厚度更元平均，亦都唔似水喉膠布咁容易拉到變做一條條一絲絲。（2024年9月9日）
如果箭桿外徑本身已經比較粗，outsert nock亦都未必係好嘅選擇，因為扣弦手指更容易會夾箭，而發射時箭尾打到弓身出現clearance問題嘅機會亦都更大。
Insert nock今次就唔講，因為都比較無乜特別，而且X10用唔到insert nock。