屎怱痕買多隻2024年新出嘅MKXG，明明之前買咗隻MK X ON都只係射過一兩次。先說重點整體黎講我係like呢隻弓身嘅，並唔係話佢特別出色或者所有嘢都做得好好，但係適合我嘅需要。由2010（？）年開始射Hoyt HPX，之後射過唔同弓身例如Hoyt Ion-X、W&W Inno Max、W&W ATF、Gillo GT、Hoyt Xceed、MKZ，Gillo GX，甚至走返去射舊款Sky、Hoyt GMX、KG XCR等，反反覆覆都係覺得HPX最順手，但今次MKXG感覺幾唔錯，希望可以安樂去射一段長時。由於我都幾歡喜呢個弓身，所以呢篇開箱評測好有bias都唔奇。
超簡短評價係：有方向但唔算好跳、弓身偏硬、比較震、重量重心喺上面。調較容易，而且tiller、alignment等全部位置都鎖得夠實淨，即使把弓偏震但暫時都無嘢鬆過。比較特別係MK第一次加咗個調較弓片水平系統，而啲相關配件係做得精細嘅，另外就係上下弓片pocket位後面有位裝專用weight。懷疑Tiller Bolt螺絲窿位做得唔準，但未有實質影響。
配件
跟個弓身自然有弓袋，仲有專用weight兩粒、調較弓片水平嘅配件、另一隻握把、同埋一抽六角匙加螺絲批。如果唔係打食評，我都未必會特別去睇本說明書，但我亦都興幸有去睇本說明書（MKXG Riser User Manual）同維修保養指引（MK Archery Equipment Warranty Manual Guide），因為我都睇得幾開心。兩本manual都有用四種語文韓文、英文、日文同殘體中文字，內容唔好期望翻譯得超準確，但係係睇得明嘅唔係網上亂譯。而本維修保養指引最後亦都有講少少品牌理念同介紹生產，不過就淨係得英文，唔理內容，單係加入品牌介紹呢個動作本身就令到我覺得個品牌係有心去做嘅。
維修保養指引內容有兩點我想提一提，第一係tiller弓檔可以扭幾多，唔係所有廠都會清楚寫明，通常要靠射手教練經驗斷估，MK就說明弓檔由扭到底計起最多可以鬆5圈。第二佢話唔好正接用火燒條弦，可能你會諗邊有人會咁做？但我見過唔少人燒護弦線燒搭箭點埋口係個火直接橫跨過條弦黎燒嘅，咁最好就安全啲唔好咁做。
而說明書亦都好好清楚寫明啲基本嘢，例如度拉磅係計弓身pivot point支點拉開26寸1/4，即係true draw length，唔洗你諗把弓身邊緣係唔係28寸加唔加1寸3/4之類咁複雜。弓身配唔同長度弓片需要嘅弦距建議亦都有寫清楚，不過啲數字厘米同寸嘅換算好似唔係好對。另外我亦都好鍾意佢講弓長度副圖，佢有清楚劃出66、68、70寸係整把弓鬆弦時曲線量度長度，而唔係直線。各個唔同配件同各項調整方法亦都有非常詳細說明，圖文並茂，如果本身無乜調弓經驗，本說明書係幾大幫助，望住佢會畀到你信心去嘗試扭啲螺絲。
基本數字嘢，官網係咁寫嘅：
http://mk-korea.com/portfolio-item/mk-xg/
Material: AL7075
Weight: 1,260g
官網介紹MKXG足足有7個無乜意義嘅icon，唯一能夠吸引到我嘅係High Quality Control個logo內寫住嘅Made in Korea。其餘有啲icon都幾好笑，當中有兩個分別係寫accuracy同stability，斷仲佢唔會有把係sell inaccurate同unstable掛？而且再望吓其他型號，原來佢所有弓身介紹都有呢兩個icon。
外觀
只係見過三隻顏色實物包括紅、紫及銀，建議唔好信網上圖片，銀色色差都幾嚴重，而且實物隻銀色都幾奇特。而我隻紅有輕微偏橙。另外仲有特別色白、粉黃、粉紅、深灰（？），唔一定有途徑訂到。
比較奇怪係無論弓身係咩色，個Center Alignment System「中心對準系統」同埋專用weight「弓把重量」都係紅色無得揀，藍色弓身撞紅都算，咩綠色、粉黃加紅色就撞到呯呯聲，希望佢繼續生產時會搞搞佢。
除咗顏色之外，仲有另一樣圖片反映唔到嘅嘢需要留意。弓身上有頗多坑紋花紋，特別係風洞邊位，鍾唔鍾意好係個人喜好。
有上下平衡桿螺絲位，握把底亦都有螺絲位，比較容易按自己需要再調重量分佈平衡桿配置。雖然我無用握把底螺絲位，但我幾鍾意佢個設計，因為螺絲位附近好闊落空間好足夠，想要裝粒比較肥嘅吸震膠都無問題，有啲弓身雖然有呢個螺絲位但太窄，握把頂住，肥少少嘅吸震膠就裝唔落。
物料 / 生產
MK其他頂級弓身都係用AL7075，係中價弓例如MK X ON先用AL6061，今次MK XG亦都無例外係AL7075。而喺官網啲介紹入面就提到生產時用咗Machining center tool MCT生產技術。而呢個MCT技術佢話係「core manufacturing technology of MK ARCHERY Riser」，咁會唔會係之前嘅頂級弓身都有用緊呢個生產方法，並非新嘢？
佢呢個介紹並唔特別吸引到我，我自己習慣睇spec時比較少留意佢講咩，多數只係留意數字，因為廠商好慣常用buzzword或者整太多icon出黎，睇完都唔係好明，又或者又無乜實際意義。呢個MCT生產技術，同埋其他資料，我買之前其實都無睇過，只係因為打呢篇開箱文先走番去睇。
由於唔認識「MCT生產技術」，而呢個名又好似buzzword，於是問吓Google大神，大概係話舊時一部機只可以做一樣嘢，而machining center就可以一部做晒，好處係比分開多部機做更精準，同時減低人為出錯嘅機會。咁究竟係真係做得準啲，定只係撻個名堂出黎好似pro啲，我就真係唔識。不過當我試用調弓時發現有一個問題，好大機會正正係同生產有關，之後會詳細講。
重量
MKXG得1,260g就咁睇好似比其他型號算輕，例如MK S, MK Z, MK Beta等都係1,320g，而比較輕嘅MK SD都有1,300g。
但其實跟弓有兩舊鋁合金weight，每粒22g，分別裝喺弓身上下兩個limb pocket位後面，加埋兩粒螺絲總重就會係1,310g，咁就同其他弓身差唔多。依然係覺得唔夠重可以另外買SUS不鏽鋼版weight，64g一粒。
握把
一如其他MK弓身，跟兩隻膠握把一中一高，上面有防滑紋。搵唔到資料有講兩隻握把分別係幾高，咁就大約度一度。低嘅一隻大概係45度，高嘅係50度，即係咩概念？借同R-Core資料比較，R-Core中係38度，高先係45度。
重心
MKXG係上半重過下半，官網無特別提及呢樣嘢，不過MK會將上下完全平衡當係一個賣點，所以上下完全平衡嘅型號係有特別講嘅，例如MKSD同X ON。上下重量平衡嘅好處官方說法係會比較減震，但呢個並唔係我鍾意嘅位，我單純係偏好上半重嘅弓身。我學習射箭嘅年代用過好多弓都係上重，自然建立咗一套適應射弓身上重嘅重作，畀把平衡嘅弓身我硬係唔順手，所以呢點對我黎講好重要，而家市面唔多弓身設計係咁樣高重心，選擇比較少。而呢個絕對係個人喜好，並唔係話上重好過平衡。
硬 / 回震
睇圖都可以見到，MKXG弓身上開嘅風洞都幾多同幾大，其實就合理嘅，因為佢用7075但又唔算重，一定係偷走好多位。諗住窿多把弓會比較淋身，但實射時又唔覺得，反而仲覺得佢偏硬。而弓身物料硬又開得多窿就預咗唔點吸震，撒放後回震比較強都係預期之內，而呢點亦都令到弓身比較敏感，各樣嘢例如上下弦高需要認真調準，否則只會更震。
呢度我會諗到另一個問題，就係揀MKXG之前，有無需要先考慮正在用咩弓片，或者將會用咩弓片，因為平弓片質素比較參次，較大機會會有上下唔對磅或者弓片扭曲等問題，當弓片質素唔靚時撒放後餘震就會比較嚴重，而MKXG並唔太能夠幫你「遮羞」覆蓋呢啲問題，所以唔可以旨意夠把弓身吸震當無事。當然，如果加得夠weight、吸震膠，咁問題就唔大，但用平弓片嘅應該都係較初學者，未必應該加咁多weight同吸震膠。
專用Weight 弓把重量
官網話上下pocket位置各可以加一粒weight，但我嘅睇法係呢兩粒weight本身就應該當做弓身一部份，所以問題係應唔應該拆走佢射同幾時拆，而唔係幾時加裝。雖然MKXG唔裝weight 1,260g重量上未算太輕，放箭把弓亦都唔算好飄，但因為上面提到撒放後回震比較大嘅問題，唔裝嘅話其實把弓震得都唔係幾好射，即使加番更重嘅平衡桿同weight減輕回震問題，始終亦都無喺弓身上直接加埋上下pocket後面兩粒專用weight咁硬淨咁穩陣，所以我嘅睇法係無咩事都唔好拆走兩粒weight。
咁拆weight呢個設計係咪多餘？我又覺得唔係，有得揀好過無得揀，我嘅諗法只係拆weight最重要用途並唔係畀你用嚟調弓，或者按個人偏好黎加重減輕，但依然有其他情況值得考慮拆黎射，例如有射手由好輕身嘅入門弓升級到MKXG，可以先拆weight打慢慢加重慢慢適應，又或者有啲人想一步到位買一把頂級弓身過世，咁喺未有能力用咁重之前就可以拆走兩粒weight嚟射住先，之後先再加番，雖然回震會比較嚴重，但MKXG始終係一把貴弓，手感未必會差過入門弓。不過都要留意MKXG比較入門級平價弓硬好多，對初學者而言，會較使用入門級平價弓難控制，而且回饋比較差，有可以影響學習過程。
Tiller Bolt 重量調整螺絲栓
上面提到維修保養指引寫明Tiller Bolt（冬茹 / 螺栓）最多可以鬆5圈，另外說明書亦有提及拉磅可調範圍係3圈。
冬茹外觀正正常常，全金屬面頭有啲花紋，暫時未知容唔容易生鏽，同牌子另一隻弓身MK X ON粒冬茹就好快生鏽，但外觀唔係同一個款。冬茹無咩特別好講，反而我想講冬茹後面嘅窿。一般調較金屬製弓身時我哋會用呢個螺絲窿黎對位，調較弓片中線，因為呢個窿位應該要做得準確需要絕對喺正中間。但今次咁就出事，MKXG除咗有螺絲窿仲有另一個官方窿Center Identification System嘅窿用黎對位較弓片中線，喂大佬兩個窿唔對位嘅？
搞唔掂直接問廠商。MK回覆非常快，而且唔係負責sales職員自己亂覆，佢係立即轉達去問技術人員再回覆我，呢個位值得畀like。回覆內容大致係話應該用Center Identification System個窿對位調較弓片，唔好理粒冬茹螺絲窿位。佢亦嘗試進一步解釋用冬茹螺絲窿對位唔準確，但可惜佢提出嘅所謂原因係完全唔合理。咁我就當韓國人英文差，唔post佢個回覆出黎批鬥。但我哋應該要知道點解冬茹螺絲窿必需要絕對準確，所以一直都被用黎對位，如果冬茹唔對位，即係話有幾個可能性：
粒冬茹個窿開歪咗，咁粒冬茹就唔喺弓身正中央，由於冬茹係弓片嘅支點，弓片歪埋一邊咁無論點調較都唔會番返正中央，因為調較只能夠較弓片尖，pocket U字位（limb base fork / butt）支點係固定無得郁嘅；
粒冬茹個窿開斜咗，可能螺絲窿冬茹一面無歪，只係底部唔對位，咁即係個窿並唔垂直弓身，成粒冬茹斜咗嘅結果係冬茹壓住弓片嘅平面都係斜，左右唔對，一係就有虛位唔穩陣，一係就扭歪條弓片，有少少似用下面會提到個horizontal alignment block咁，只係壓住嘅唔係弓片近射手一邊而係面向靶一邊；
因為MKXG本身外型，開窿嘅位置好深一直去落底，足足有5厘米深，平時其它弓身可能只係2到3厘米深，但可以螺絲牙並唔係成個窿都有，只係前半個窿有牙。如果開窿開唔直但螺絲牙鑽得直，咁就唔會影響弓片，只係無辦法用個底窿對位。三個可能性之中最理想係最後呢個情況。
我諗到嘅只有呢三個可能性，如果有其他可能性請留言或者PM話我知。暫時我調較好弓片中線後射係無問題嘅，所以我假設冬茹無歪無斜，或者幅度細到我感覺唔到有影響，只係個窿有問題，但呢個位一定係唔理想，最好能夠做番準確對位。除非本身個設計圖已經有問題，否則應該係生產嘅錯，咁我對個MCT生產技術就好有疑問。
Center Alignment System 中心對準系統
調較弓片中線用扭螺絲左右一邊鬆另一邊推個horizontal alignment block（水平對準塊）嘅設計去做，好大路，pocket入面有大螺絲垂直鎖實個block，好穩陣*，不過因為弓片遮住咗粒螺絲，所以調較完都係要鬆弦拆弓片鎖緊螺絲後先再射，唔能夠一邊調一邊試射。雖然聽落比較麻煩，但呢粒用黎鎖實個block嘅螺絲係有必要存在，舊時有其它弓身無呢粒螺絲，只靠左右兩粒調較中線螺絲迫實個alignment block，結果係個alignment block會走位唔準確。始終alignment同弓身係兩舊嘢，無論造得幾準都會有虛位，單靠兩邊螺絲迫實金屬對金屬，即使左右未必會移位，亦都有情況係成個block唧起咗，變咗反反覆覆要扭好多次搞好耐，甚至乎每次開弓上弦都差少少有分別。
唯一我會覺得兩邊調較左右嘅螺絲都幾大粒，用細少少會比較好，因為螺絲大每轉一圈牙都會推郁弓片好多，調較中線時就要好小心唔可以太狼死一扭扭太多，可能扭1/8圈甚至1/16螺絲已經會有明顯分別，咁要好準確地調較其實都幾考功夫。
*2024年10月28日按：有讀者提供資料話佢隻弓身調較弓片中線螺絲鬆，即刻檢查吓自己把弓有無問題，雖然無鬆，但確實存在同樣問題。螺絲理應推到窿入面頂實水平對準塊，但因為螺絲只係做到同對準塊窿深度一樣長，所以有啲螺絲夠長，有啲就唔夠，唔夠長嘅螺絲只有螺絲啞頂住水平對準塊外圍，所以頂唔實同時容易鬆。
我把弓四粒螺絲只有一粒夠長。要自行解決都唔難，墊厚少少個窿等螺絲可以迫穩水平對準塊就可，不過作為一隻頂級弓身，呢個位出事確實係設計時考慮不周或者生產質素唔理想。其實睇番佢個窿位已經做咗斜邊，如果做得準螺絲夠長理應可以頂得好穩陣。
個block入面仲有個horizontal alignment block（404 Error官方無翻譯到），係MK第一次加呢舊嘢入去，佢提供兩個level block（水平塊），各有正反兩面唔同高度所以總共有四個高度可以揀黎用，望落做得幾準確，唔似之前用過某H牌把弓身啲parts，本身已經高高低低QC極差。同比較多人見過嘅攝金屬片方法唔同，換parts感覺上比較容易用，喺箭場同搞嗰幾塊頭豉咁細嘅金屬片都幾麻煩。唯一我嘅顧慮係個水平塊好細而且係鋁製，會唔會好容易撞凹壓花影響使用就要用耐啲先知。
呢個調整弓片水平部份我就無試用過，我由始至終都覺得呢種調較弓身片horizontal alignment嘅系統係唔應該存在，因為扭曲嘅弓片就係扭曲咗，無論點扭番正都唔會係於整個屈曲過程力量左右平衡，而弓身pocket亦都必需要確保造得平唔可以斜唔可以扭曲弓片，所以根本唔應該需要調較弓片水平。
不過我諗到呢個位有可能性用作另一個功能，四款高度唔同嘅水平塊有機會改變弓片拉感軟硬，類似之前某H牌嘅limb alignment system，不過該款係除咗調較高低之外再調整前後位置，影響一定比較明顯。呢個只係一個可能性，因為跟把弓只有一雙厚身level block，所以唔足夠將上下alignment block總共四個位都同時換做厚版。
留意個alignment block係壓住level block，如果想要調弓片水平 / 扭曲就必需先要將成粒alignment block鬆晒拆出黎，所以調弓片時按先後次序會比較容易，先調整水平再調中線，否則就需要自己記錄得好清楚alignment block位置，以防較唔返正。
Center Identification System 無官方翻譯
Center identification system就係弓身背後個長條形窿，用黎對弓弦調較弓片中線，直身長條形上下窄中間闊少少設計都幾易睇。呢個只係調較弓片中線嘅一部份，不過官網就將其作為一個賣點特別分開提及。我比較貪心，覺得如果個Center Alignment System底部外露位置再加多一個刻度就更容易對位。
其他事項
用黎上平衡桿螺絲嘅窿開得好夠深，螺絲牙亦都入得好靚無膠水漬，可以安心扭平衡桿入去，需要自己做多次攻牙嘅機會比較微。
有聽聞過（更新：準確啲係同牌子MK其他型號弓身）使用其他牌子弓片時會出現跌磅情況出現，不過我係用新弓片試，亦都無W&W或者Hoyt嘅弓身喺手測試，所以無法做比較，但我拉出黎對弓片係足磅嘅。
瞄準器同箭側墊窿距離係3寸，同Win&Win差唔多。轉會時可以留意吓係唔係同自己把弓差唔多，大概調較一吓瞄準器。
使用後感想
弓身唔算好跳，但有方向，必需要推弓射。方向試得唔太準確，因為MK隻握把我唔係太啱射，姆指一邊有虛位壓唔穩，已經訂咗握把，待到貨後再睇吓會唔會有幫助。
本身弓身唔重，由於整體偏硬偏震，唔能夠落太少weight射。試射時一路加減，用過4寸5寸延長桿，又拆過裝過pocket兩粒weight。感覺最好，MantisX8 評分最高係要用到5寸長延長桿，要加上香，把弓瞄準時就感覺穩定，撒放後唔太震。但咁嘅配重對我黎講有啲吃力，所以暫時拆咗上pocket粒專用weight。其實有少少矛盾，我想要重心頂重但又拆咗上面粒weight，但比較過唔落上香但唔拆上pocket weight，感覺把弓唔夠跳，而且方向跳得無咁準，所以都係選擇要落上香。
暫時用緊嘅係：
弓片：Fivics Titan EX 68-42
中央平衡桿：30’ Doinker Podium Hi-Mod + Doinker A-Bomb + 4oz. weight
側平衡桿：12’ GGX + Fivics Mini V-Zero damper + 2oz. weight
延長桿： 5’ Doinker PE5
V-Bar：Shibuya solid v-bar
上香：Fivics TN-1000
如果想要一把正正常常，唔想有咩意外、唔想要大改變或者花長時間先能夠適應嘅弓身，MKXG係合適嘅選擇。如果需要頂重重心偏高，絕對值得課金。
相反如果射慣碳弓要弓身好吸震，要一把拉開自己就好穩定完全唔洗推得準確去射嘅弓身，就唔應該考慮MKXG。又或者你因為粒冬茹螺絲窿問題而感到不安，就唔建議博，又或者等吓睇吓之後會唔會有改善。雖然今次廠商無承認有問題，但其實各個牌子都有前科，陰啲陰啲去修正改善問題，第一水貨並唔係最好都好正常。
後記
呢篇打完並唔係第一時間出文，因為有射手建議我hold到6用尾，待國際賽事完成再出。事緣參加賽事嘅香港代表隊當中，正好有運動員用緊呢款弓身，為免射手睇到完篇文之後疑神疑鬼，影響其心情表現，等到賽事完成後再出文比較好，而我亦都多咗時間慢慢試耐啲個弓身。
嗨，卡尔文、
我的 MKXG 出现了问题，我在射箭论坛上发表了我的看法。下面是我帖子的链接。
https://www.archerytalk.com/threads/mk-mkxg-riser.6282182/?post_id=1116406864#post-1116406864