之前分別有幾篇提過吓校alignment調校弓片中線，分別係「選擇器材3」、「How to…弓身 」同埋「How to...弓片」，但就無好正式詳細講過。Set alignment應該係裝組基本設置時候難度最高嘅一件事，本身理論並唔複雜甚至乎可以話係好簡單，總之所有嘢對齊正中間弓中央平面就搞掂，但係實際落手調校就好依賴經驗，好難睇得準。除非你係一個教學校箭隊嘅教練，否則好難有機會睇過校過好多把弓，經驗值多極有限。
如果趕住要set弓，唔想睇咁多理論同廢話，可以直接拉落底去20個建議同我自己慣常做法。萬一調極都調唔好可以拉番高少少睇吓幾個例子有無啟發，最後先睇番開頭。
弓身調校系統
先睇唔同廠商幾種唔同調教弓片嘅方法，呢個之前都有提及過：
第一款最舊式用偏心圓去推弓片U槽，而家應該已經唔存在，如果你知識仲有
廠商生產嘅弓身係用呢個制式歡迎話我聽。
第二個方法攝片，呢個方法好處係可以量化，知道校咗幾多、容易記錄並能夠重複，唔好處就係無得微調，硬係兩塊片中間就無得搞。
第三個方法最普及，用螺絲推郁弓片或者插槽，令到弓片向左右兩邊移動。好處係可以微調，唔好處係好難知道自己校咗幾多、做記錄，而且唔容易重複。呢類型設計當中有部份型號容許裝好弓片上好弦時調校，唔需要每校一次又裝拆一次，望一望校一校，調校比較方便。但為咗要實淨唔鬆，好多時插槽都會有粒螺絲鎖實，變咗每次教完都要鎖返緊，跟住再裝弓片上弦先可以睇到個結果，未校啱又要再拆過黎調校。
所有嘢都係假設
跟住就入正題，我哋嚟睇下調校時候有乜嘢reference可以睇，同埋當中有咩假設。認清楚有咩假設非常重要，基本上所有嘢都只係我哋假設佢係做得直、做得準，萬一個假設唔成立，我哋又無為意有問題，咁就無辦法知係咩對唔準對唔直。好在我哋有多過一點做參考，咁就可以推斷有無邊一點係唔準、唔應該拎黎做參考對位。
弓弦對弓片
調整弓片中線最主要就係想見到弓弦對弓片，兩者都需要喺弓中央平面上運作，最正路就係用limb guage睇，無limb guage就需要自己貼膠紙劃線，不過有limb guage最好都係用limb guage，劃線就會多咗機會出錯，可能劃線劃得唔準、可能左右兩條線粗幼有分別。另外建議同時用多過一對limb guage，夾去弓片上唔同地方，咁就會比較容易睇得清楚整個情況。
有講法limb guage應該要夾去離開弓身大概2、3吋位置，統一做法係好事，但留意Beiter 官方係無講過limb guage要咁用，相反說明書話可以將limb guage盡量夾近弓身，去搵中線同檢查弓身有無攣，而當目標係想檢查弓片時就應該將limb guage夾近弓片末端。不過本身Beiter limb line guage設計形狀就無辦法可以夾得近弓片尖，一黎會畀條弓弦頂住，二黎個夾太闊尺寸唔對，於是Beiter之後就推出咗另一款 limb tip line guage去解決呢個問題。
呢度見到Beiter講得好清楚，limb guage用途唔單只係用黎檢查弓片對唔對得準、有無扭曲，同時亦都係用黎睇吓隻弓身直唔直。我哋好少會見到弓身唔直，但絕對唔可以排除呢個可能，一般我哋都無為意隻弓身可以攣，假設佢無問題。平價垃圾級別弓身唔直機會校大，但貴嘢用得耐其實都有機會攣。
弓身直只係我哋一相情願眾多假設是一，就使用limb guage夾弓片呢一部份，我哋仲有其他假設，例如弓片左右兩邊闊度一致，或者limb guage兩邊夾緊弓片力度一致 。如果是但一樣假設唔係事實，咁個limb guage本身就唔會喺正中央，拎一個唔喺中間嘅limb guage嘅刻度做參考去搵中線，你永遠不會成功。
弓弦對弓身
淨係得弓片同弓弦好難對得準，我哋仲需要搵中弓中央平面對準弓身。一般做法係用弓身tiller bolt螺栓嘅螺絲窿做參考，亦都有人會拆咗個握把去搵弓嘅中央位置對位。有少部份型號弓身本身箭檯shelf就有刻度畀我哋做參考，咁就唔需要估估吓。 而其他型號弓身除咗tiller bolt螺絲窿之外亦都可能會有其他刻度去標示弓身嘅正中間位置。就咁睇落好似有幾樣嘢可以做參考，好似好準，不過呢啲全部都只係假設佢無問題，信廠商做得準，現實並唔會畀我哋咁輕鬆。
例如我用緊隻MKXG弓身，廠商好親切咁整多咗個窿做參考，但問題係點解個窿同tiller bolt螺絲窿都已經唔對？！向廠商查詢，回覆話淨係對個參考窿位，唔好睇個tiller bolt螺絲窿。我就唔能夠理解亦唔接受呢個講法，弓片依賴tiller bolt螺栓定位，如果tiller bolt螺栓唔對中線，弓片有咩可能對得準中線？就算對得到都只係夾硬扭番正佢，咁只會令到成件事更複雜，產生更多問題。
理想中tiller bolt螺絲窿係需要喺正中央，呢個唔單止係用黎做參考對位嘅問題，更加係影響弓片運作，如果tiller bolt螺栓唔喺正中央，把弓已經唔能夠算係正常。我把MKXG暫時射得好地地，亦都調到弓片中線，至於究竟係tiller bolt歪定個特設對位用窿歪我就講唔實。
而Tiller bolt螺絲窿做唔準其實比想象中普遍，全碳纖弓身本身就好難做得準螺絲窿位，我嘅習慣係一律當佢唔準，完全唔會考慮拎個螺絲窿位做參考，只會係調完弓片中線順便望吓，檢查吓隻弓身做得直唔直。
弓身仲有另一個位置好重要影響好大，亦都只係我哋假設佢無問題，呢個位置就係弓身插槽邊接觸弓片嘅位置。有留意開嘅朋友都知道，我一向都非常唔滿意現今廠商做法，插槽會有組件畀用家調校，美其名畀用家調校弓片水平，對弓片如果扭曲都有得救，實際上只係掩飾生產時未有做準弓身插槽及弓片質素參差問題。我無見過舊時頂級弓身插槽會做唔平，即使係碳弓身本身難做準，或者漆油上色難以控制油漆厚度，都可以好似WIAWIS InnoCXT咁加塊金屬片整靚整平個位。
接觸弓片呢個平面必需要絕對水平，將呢個位置做得精準係弓身生產商責任，再退一步，如果弓片本身有扭曲，用呢個位置水平去補償亦唔一定能夠解決問題，因為弓片扭曲即係拉開同未拉開時位置根本唔同，任你點調校都好難令到弓片屈曲或回彈時由頭到尾都沿直線走，咁弓片推支箭都唔係直推，弓片對唔對準中線已經唔係重點。不過無論歡唔歡喜都好，現實係商廠已經將個波傳咗畀射手，呢個位置而家好大機會需要調整，唔可以假設佢水平。而唔水平結果就係扭曲弓片，即係有咩問題都未必關中線事，同時要考慮弓片有無被扭曲。
最後仲有一個位置有機會唔水平，就係tiller bolt螺栓接觸弓片嘅平面，呢個位好少會做得唔準，最大可能就係上面講到弓身開窿開唔平，成粒螺栓打斜咗接觸平面自然唔會水平。但亦都有好細微嘅機會係螺栓本身有問題，例如蘋果牌有一期出過一隻叫做floating tiller嘅嘢，概念上係想無論螺栓扭幾出幾入，螺栓平面都可以完全緊貼弓片。
但實際上因為粒螺栓可以活動，同時有一塊膠圈夾喺螺栓同弓片之間，膠圈有時會攝咗喺螺栓同埋弓片中間，於是一邊厚咗一邊薄咗，雖然未至於會嚴重扭曲弓片，但我就唔相信佢可以每次裝弓片嘅時候拉磅及中線會完全一致。網上有資料話蘋果唔係唯一一間、亦都唔係第一間廠商生產floating tiller，但呢個設計用咗一排就被蘋果牌淘汰咗，而嗰期買咗弓身嘅射手有啲會拆咗塊膠圈，甚至自行換返舊版螺栓打。雖然無辦法100%肯定呢個問題設計有影響，但寧可信其實有，無需要郁嘅部件最好就係唔識郁。
弓弦對平衡桿
完成弓身就到平衡桿，我哋想將所有嘢對正中間，包括平衡桿。而當調校弓片中線時，平衡桿亦都係一個我哋會用嚟做參考嘅位。無錯平衡桿喺中央平面又係一個假設，我哋假設緊平衡桿所有駁口位、螺絲、螺絲窿都係做得準做得直，同時亦都假設弓身螺絲窿同埋平衡桿接觸嘅兩個平面無歪。
最容易出事嘅係平衡桿同弓身之間嘅駁口位置，單靠一口短短螺絲連接弓身及平衡桿，是但一邊角度差少少平衡桿就無可能對直，可以係：
粒機米螺絲唔直；
螺絲窿開窿唔直；
螺絲窿開牙開得太深，將平衡桿扭入螺絲窿嘅時候就有虛位，你會感覺到支棍就可以揈嚟揈去；
兩個接觸平面唔係完全平；
駁口位中間加隻膠圈戒指，膠介唔平 / 厚度唔平均
以上都只係舉例一啲使用單支中央平衡桿時可能會遇見到嘅狀況，如果有用延長桿、側桿及V型座，每一個駁口位都可能會有呢啲問題，最後歪嘅機會亦都愈高。另外平衡桿金屬cap同埋碳桿之間亦都未必做得好準，有機會攣，平價貨呢個問題會比較常見。
講到好遠變咗講平衡桿，但我哋係想要用平衡桿做參考對位去調校弓片中線，所以都必需要考慮會唔會係平衡桿本身有問題，唔能夠拎黎做參考。
例子
上面提出一大堆有機會出事嘅位，調校弓片中線時我哋需要用呢啲位置做參考，我哋假設佢無問題做得準做得直。但實際操作嘅時候我哋就要分析邊樣嘢可能有問題，再考慮揀用咩黎做參考去調校會比較準確。
跟住落去我哋就真係睇下當調校弓片中線嘅時候會見到啲乜嘢。
最理想當然係好似上圖咁所有嘢完美對正正中央，弓弦、弓片（用limb guage望，最好用多過一對）、弓身tiller螺栓窿、弓身箭檯bow shelf、握把中央、弓身其他對位用刻度（如有）、及平衡桿等，咁應該就完全搞掂 。
上圖情況其實左圖同埋右圖係同一件事，係同一把弓同一對弓片同一個setting，只係我哋睇嘅時候角度有偏差。左圖喺企歪咗去左邊去睇，右圖先係對正把弓，想象我哋要所有嘢對位喺同一個平面上面，如果我哋隻眼已經唔對位，咁就無可能睇得準。我哋成日記住想要弓弦對到limb guage中間，所以好直接就會想搵個位睇到呢個我哋想要嘅結果，而圖中情況就好自然會走咗去左邊去睇。我哋目標係要將弓片調校到去中線，睇到條弦踩正limb guage中央只係其中一個判斷弓片位置對唔對嘅方法，將兩者混淆就變成本末倒置。
雖然左圖係企錯位，但如果我哋只係用tiller螺絲窿做參考，可能會覺得無問題，弓弦、弓片、弓身螺絲窿都對得正無需要調校，唯一明顯問題只係平衡桿指咗向左邊，如果本末倒置已經覺得弓片唔需要調校，就可能誤以為係平衡桿出問題去搞平衡桿，錯上加錯。其實如果你好眼，可能會睇到弓弦對唔準弓身箭檯，不過呢個係比較難發現，除非弓身本身有刻度標示中線。
當我哋企返啱位，人喺弓嘅正後方、眼喺弓中央平面上，見到嘅影像就會好似右圖咁，會發現其實條弦係乜都唔對，條弦係垂直但會喺踩住limb guage左邊刻度、喺tiller螺絲窿、弓身箭檯、平衡桿左邊。咁要做嘅調校就好清晰，上下弓片同時要向右手面推相同距離。
第二個例子，我哋會見到弓弦好似對到上面limb guage同弓身tiller螺絲窿，落到去弓身箭檯同平衡桿就好似對到但又好似差少少，最後下面嘅tiller螺絲窿同埋limb guage位置就明顯唔對位，弓弦側咗去右邊。
由於未校準嘅淨係下面弓片，上弓片差唔多對正，所以上面差距好微，近乎對準中線。弓弦並非垂直，而係由上而下斜向右邊，所以愈低就愈偏離中線。
咁要做嘅調校就係將下弓片向左推。有時調整完下弓片我哋又可能發現上面都係差少少未完全對準，咁就需要反覆微調慢慢將上下兩邊都搬番去正中間。呢個情況我哋假設人無企錯位，眼位於中央平面，萬一對唔正，所有嘢都會唔同晒，可能以為上下都差好遠都需要調校。
第三個例子，弓弦踩住上面limb guage左邊刻度，下面踩住limb guage右邊刻度，呢個更清晰弓弦係由上而下斜向右邊。
咁上下弓片都有需要調校，上弓片向右推，下弓片向左推。至於扭幾多推幾遠，校完會唔會過咗籠，咁就要視乎弓身調校方法同依賴經驗，調校時需要反複檢查，通常都唔會扭一次就校得準。所以調校弓片中線先會咁麻煩，校嚟校去搞成日都唔一定搞得掂。
你個嘢壞咗呀
有冇機會係點校都無辦法對得準？如果弓片本身扭曲twist咗，係有咁嘅可能。 Twist我哋有提過可以用其他方法去檢查，例如上弦後將兩支箭分別攝去弓弦與上下弓片尖中間，睇下兩支箭係唔係水平，又或者直接望下個弓片尖係唔係喺弓片嘅正中央位置。
舊款嘅弓身插槽無得調校水平，當弓片輕微扭弓時我哋習慣直接用弓片中線嚟調整遷就，而家有得調整個水平位就需要先校一校個水平。但係如果公片扭曲得好犀利，好似下圖咁，基本上已經係無得救，繼續使用亦都會有危險，唯有掉咗佢買嗰對。
咩程度嘅扭弓先算係無得救？通常如果拉完弓放低時，或者射完一箭後，弓弦根本入唔返坑，咁就係一個提示弓片已經扭曲得好勁。
又可能有情況係我哋以為調校弓片中線校得好完美正喺中間，但係射嘅時候都係感覺到有問題或者見弓弦入唔返坑，咁就表示弓片有機會係扭曲咗，又或者其實係弓片扭曲加上校唔正中間兩個問題加埋。我哋調校弓片中線時對位睇到嘅只係弓未拉開時狀態，拉開時弓片可能傾側向一邊，當兩個問題同時存在時，弓弦喺所有嘢正中間呢個只係一個假象，調好水平後弓片中線又會需要再調校。
因為拉開弓同未拉開時可能有分別，所以亦都有工具係畀人撐開把弓去睇alignment，我對呢個方法無乜大興趣，留番以後有機會再解釋。扭曲加上唔對中線，再深入講落去就係調弓而唔係裝組基本設置範圍，留待討論調弓時再講。原本我確實係正在寫有關調弓嘅文章，但調校弓片中線實在比校複雜難度校高，值得獨立開一篇嚟講。
而家先係開始…
調校弓片中線好難，有太多嘢可以睇用黎做參考，有太多假設，有時自己調校時都搵唔到咩部份出問題，特別係學生平弓平器材，樣樣都可以有問題時。希望呢一篇可以令到大家容易啲理解調校弓片中線時預期見到乜嘢，影像又代表緊乜嘢要點樣去調校。上面列舉嘅例子，有情況係見到嘅嘢唔準確，調弓片中線時唔能夠用黎做參考。我相信上述列出嘅假設並未完整囊括所有問題可能性，但重點係其實好多嘢都只係我哋假設佢無問題，而調校弓片中線就係要搵出問題。機會輕微0.0001%即係表示都機會出錯，如果唔留心就可能會錯過咗真正問題所在，校黎校去都校唔啱。
調校弓片中線講到呢度，都只係基本設置，未真正開始調弓。於調弓時弓片中線仲有其他考慮，有唔同原因可以再作微調。
最後分享一啲落手調校弓片中線時嘅建議，同埋我慣常嘅做法，希望幫到大家容易啲調準弓片中線：
第一件事先檢查弓片有無扭曲，一隻手捉實弓片中段，另一隻手捉近弓片尖左右扭動。如果弓片本身有扭曲，一邊會淋過另一邊好多，感覺會好明顯，特別係平價輕磅弓片。呢個關乎弓片有無可能調得準中線，如果扭曲嚴重都無需要花太多時間去搞；
先唔理弓片有無問題，先將弓身插槽重置去中間位置開始調會比校容易睇；
唔建議拆弓身握把搵中間位做參考，一黎好麻煩，二黎握把位中線並唔係咁容易搵得準。即然無信心搵得準，就無謂加多樣嘢擾亂自己；
好多弓身其實唔需要鬆弦去調校弓片中線，咁就容易睇郁咗幾多。但但有時唔鬆弦扭，個插槽未必食得好實，大概調好之後都係要鬆弦拆弓片再重新裝一次檢查會比校穩妥；
首先必需要確保人企正弓後方、眼對準中央平面，人可以左右移動搵一搵個中間位先，唔好急於將弓弦對準limb guage；
雖然裝晒側桿V形座放把弓喺凳上面睇alignment係最方便，但如果唔肯定堆棍有無問題，最好先用一支單棍開始；
基本設置時先搵一支你覺得全宇宙最直嘅平衡桿裝上弓身做參考，無需要急於裝上自己用緊嘅成套平衡桿去睇；
扭平衡桿時留意會唔會揈嚟揈去，如果揈得嚴重即係有問題有大機會對唔準中線；
上面正常，下面唔正常：
對中線時唔好掂弓弦或者弓片，壓歪就對唔準；
人係郁黎郁去唔穩定嘅，特別係用單眼去睇，視線掃上掃落望兩隻limb guage對位搵中線時。人可以企近牆邊，手肘頂住牆身手掌支撐頭部去睇咁會穩定好多；
碳弓唔好用tiller bolt螺絲窿做參考對位；
如果唔確定睇得準唔準，影相睇係一個可行嘅輔助方法，但鏡頭要對準中線其實都唔容易，要畀耐性多試幾次；
可以建立一個習慣，貼一張貼紙或者痴舊萬用膠去要弓身一邊，標示並提醒自己弓片要校向邊一個方向，特別係要鬆弦拆弓片先可以調校嘅弓身，搞完一輪可以已經唔記得咗要向邊個方向扭；
如果唔熟手，一次只扭一邊弓片，唔好上下一齊扭；
如果弓身調校弓片中線系統係靠螺絲推弓片或者插槽，建議調校時一次唔好扭咁多，一般扭1/8圈螺絲已經好多，可以將弓片由一邊推過籠去到另一邊；
有人會垂直放T尺喺弓窗上，T位頂住弓弦，用黎檢查弓弦有無偏離中央平面。我唔特別鍾意呢個方法，原因有幾個，第一把把弓個箭檯闊度唔同並無準側，好難搵中央平面位置；第二我最終調弓優先考慮並唔係弓弦喺箭檯正中央，所以呢個參考對我調弓無大作用；第三平價弓身弓窗並唔係必然垂直，呢個只係我哋假設。不過大家可以試吓呢個方法對你有無用；
有時剛裝好弓片上弦會見到弓片中線走咗位，唔一定要急住去調校，可能射幾首又會走番啱位。當然呢個係好差嘅情況，因為咁即係話頭幾首箭中線未歸位時根本就射唔準，但有啲弓身礙於設計問題真係會有咁嘅情況發生；
如果肯定弓片扭曲，基本設置時優先要對位嘅並唔係弓弦同limb guage，應該先確保箭大概位於箭檯中央，咁箭側墊出入位置就唔會好奇怪；
如果用埋箭黎對位，箭理應係微指向左邊（右手射手），當調完弓片中線預設好箭側墊後，可以檢查箭同弓窗距離是否合理，如果近響片一邊比校貼近弓窗，近箭托一邊校遠離弓窗，即係箭指向右邊。請砍掉重練；
呢篇講嘅只係裝組基本設置，硬係校唔準都唔緊要，於調弓時弓片中線仍然需要微調，亦有部份問題可以留待到時解決。
icons from https://www.flaticon.com/