一直都覺得而家把弓未係太好射，仲有得tune， 襯兩場比賽中間有時間又再搞吓。
其中一個最想改善嘅位係拉開瞄準時覺得佢唔夠定會向右轉，當然呢個可以係因為唔同原因，例如：
握把手指公嗰邊掂唔實壓唔穩；
射手自己內合摺埋；
中央平衡桿對唔正弓中央平面；或者
弓片中線或者扭曲問題等
2其實唔係完全準確，雖然四個可能性瞄準時都會見到準星向右走，把弓唔定，但1、3、4都係把弓轉，軸心喺手腕附近，而2係成隻前手撐唔穩，軸心喺前肩，兩者郁動有差別，不過如果無相關經驗，兩者好相似未必容易分到。
試過做唔同嘢，連握把都已經整埋，加厚咗手指公底等佢接觸面穩固啲，咁就番返去調校弓片中線。之前並唔係無試過調校過弓片中線，但調弓時反反覆覆調完一樣嘢又調另一樣，未有時間逐小逐小微調。唔較尤自可，一較即刻發現新大陸咁，感覺改善咗好多，唔單止瞄準時弓無再向右轉，伸展用力時準星亦都可以保持釘住個靶，而且出箭時把弓跳出去亦都比之前跳得直，方向感較清晰。
今次我調校嘅幅度好細，只係將弓片上下同時向左邊推1/8圈。1/8圈有幾小？就係較alignment粒螺絲一圈啞嘅1/8。我求其用漆油筆畫兩條刻度喺插槽內，調校前後見唔到有明顯差異，而limb guage或者中央平衡桿方向就更加唔洗講，肉眼睇唔到有咩分別，
經驗上我未試過較咁少alignment可以有咁大差別，如果做1-10評分，正常調校咁細微個分別應該只係差1級。
但今次感覺係由「要再tune吓」直接上到去「符合課金買top model預期」以上、「好打得，容錯度高，射手犯錯把弓會修正」之間，連跳2.5級。
我調弓習慣主要憑感覺，不過同時都有用MantisX8分析做參巧。調校後評分平均竟然高咗三分，較之前記錄12錄箭，較之後都係射12箭。
呢個評分提升係好誇張，正常無論你動作做得幾好有改善幾大，都難以突然間高分咁多， 因為MantisX度嘅係把弓有無上上下下左左右右郁黎郁去瞄唔定或者震，呢啲唔單只係人問題，都好關乎器材得唔得。除咗評分高咗，睇圖都明顯見到出箭之後弓係出得比較直，反映嘅同感覺一致。
最後有再較多1/8圈，即同最開始時比較多咗1/4圈，感覺又變番無咁好，但又未至於原本咁差，所以最好嘅位置應該係推咗1/8-1/4圈之間某一個位置，但幅度咁細好難調校得準，而且差距咁少，需要反覆測試先能夠作準，暫時我就唔再多花時間繼續搞。
雖然呢個例子比較極端，咁細微嘅調校好小會有咁大影響，但呢度睇到兩樣嘢，第一調弓好重要，第二用工具幫手測量係有必要。一般講法調弓受射手技術、能力水平限制，因為調弓時主要依賴射手感覺及箭群集中度判斷結果，而射手感覺有幾敏銳、成績有幾好兩者都受能力限制，但喺呢個例子裡面，就算調校完之後我感覺唔到係咪好咗，MantisX8讀數都能夠清楚反映差別，協助判斷調校得啱唔啱，係唔係向緊好嘅方向發展。