放箭係一個好奇怪嘅存在，如果只用一句話做總結，就係無放箭，因為放箭只係射一支箭整個程序內一個過程，並唔係一個動作，鬆弦只係伸展用力過程途中發生嘅一件事，射手唔應該覺得有嘢要做，去令到撒放呢件事發生。
撒放做得好唔好本身就係一支箭射得好唔好嘅關鍵，鬆弦一刻非常重要，咁講好似有少少前後矛盾，唔要做嘢但又要話做得好，而且要做得好又非常之難。呢個係意識同真實嘅分別，唔去諗有嘢要做只係一個方法，我哋想通過呢個方法去做得好。諗真啲呢個矛盾其實唔陌生，競技射箭要射得準、要分數（其實射箭唔係本身就應該想要射得準？但黎到英國我發現好多人都唔係咁諗，好多射手根本無想要射得準），但我哋要專注過程做好個動作，如果掛住諗分數顧慮結果射得好唔好，就會射得唔好。
想知道撒放做得好唔好，嚴格黎講係無辦法可以直接睇到，因為放箭一刻非常快，正常唔利用錄像逐格重播我就睇唔清楚，我哋睇到嘅只係撒放前後嘅動作，例如撒放前有無縮手、撒放時有無彈手指、或者係餘勢follow through等，而餘勢並唔單係同撒放有關，更重要係反映撒放前整個動作做得好唔好直線準唔準。
雖然放箭最好唔好諗有嘢要做，但鬆弦係真實發生緊嘅事，即使撒放無乜嘢需要射手去做，但好多時射手放箭都會係會做得唔好。有時會諗係唔係教學時表達方法唔清晰，或者用詞誤導咗人，令射手理解錯咗咩係放箭。撞啱同箭友講開撒放，於是走去番查唔同資源嘅講法係點去形容放箭，究竟大家講做法係唔係一致，會唔會有更好嘅表達方法？先整理一吓自己諗法，我會將放箭分成三類講法：
1）鬆手指
好多時對初學者我哋都係咁講，我都係咁教人，當然呢個只係inception，早啲將正確觀念種落初學者腦入面，當初學者連扣弦都未知道點做或者未做得好時，根本就無可能會係可以鬆手指放箭。鬆手指應該係「無放箭」前提下射手撒放時唯一要做嘅事，特別係初學者唔會有繼續用力伸展嘅諗法，而開滿弓靠弦本身就已經有用力hold住，無需有意識肩背用力做出黎，所以要做嘅只係鬆而非用力。英文有講法let go the string畀條弦走，我覺得意像上都係類近。
呢個講法最大問題係鬆手指往往會連埋身體其他部位鬆，最容易一齊鬆係hold住拉住把弓嘅手肩同背，再距離遠啲可能係支撐弓嘅前手，不過因為後者喺另一半邊身，相對無咁容易鬆，就算真係鬆都無拉弓一邊手鬆咁嚴重，除非射手協調左右手於同一時間分別做唔同嘢好有難度。另一個有可能令到放箭時前手同後手一齊鬆嘅原因並唔係因為協調，而係放箭時射手連個精神都鬆埋，無揸緊個信念，咁其實係成個人都鬆晒，唔單止係前手。諗番「無放箭」呢個講法，「無放箭」其實就係想表示馬照跑舞照跳五十年不變，除動作用力以外更包括個專注力都唔應該散，不過單靠「無放箭」三隻字未必咁有效能夠將呢個含意傳達到畀個射手知。
要改善撒放未有保持專注可以從eye follow through入手，做吓啲humming sound練習。如果射手唔係初學者，應該有認知背脊需要用力拉弓，有伸展繼續用力概念，咁除咗鬆手指之外就會補充講話要保持背脊用力，但呢個講法唔能夠完全解決問題，肌肉可以等張收縮或者等長收縮，好多時繼續用力變咗係收緊乸實而唔係繼續後拉。唔係話收緊乸實一定錯，真係有技術會係咁操作，但亦都有好多人本身唔係想乸實，因為乸實會變成拉唔過響片，亦都會令個人唔穩定係咁震。
唔理係收緊完無辦法完全放鬆tension bias定對抗肌antagonistic muscle一齊用力，結果都係要放鬆扣弦手指以外其它某啲位先可以放到箭，同時令到拉弓一邊手於撒放後繼續向後走做出餘勢動作，呢個「放鬆某啲位」就會引起延誤。外觀上甚至乎就會係放箭時手會見到縮前少少，好似係縮手放箭咁，但其實呢個只係延誤，手未開始向後行但手指已經開始鬆弓弦向前走，而唔係真正向前縮手。
「 鬆手指」呢個講法強調嘅係唔做嘢、或者由做嘢到唔做嘢（扣弦到鬆開手指）、被動，並無操控、主動嘅概念。但由於過度簡化整個操作，可能會忽略咗射手將唔應該鬆嘅位都鬆埋，或者收緊乸實嘅問題。
2) 拉動撒放 Draw to release
呢個係先前翻譯「奧運選手的基礎射箭知識 」資料入面嘅講法：
The active drawing shoulder blade / elbow pulls the passive hook finger off the bowstring...
同樣指出扣弦手指係被動，但就避免用任何有「鬆」意思嘅字眼去描述，相反係強調主動，肩胛骨 / 手肘主動拉，拉開被動無做嘢嘅扣弦手指勾，意像上唔同，整個動作係主動操作做出黎，係受控嘅。就呢句我腦海想像中見到嘅畫面係伸展用力（文中指肩胛骨或手肘），令到手指被拉開，因為拉即係一直向後走，即使喺手指被拉開嘅過程中，直至手指離弦之前弓弦都無機會向前送，喺空間度不變，而且手指一直都掂住條弦，直到完全被拉離開弓弦。由於個做法、專注嘅重點有分別，我覺得執行呢個想法時外觀上縮嘅機會比較低。個感覺有啲似成日講strong shot好主動有力去撒放咁。
上面draw to release整句未完，後半句係
...(bowstring) which is tightly pressed to the chin, by exerting gradually increasing muscle tension
呢度亦都見到力愈畀愈大，弦愈拉愈後，唔存在鬆。
「拉動撒放」呢個講法重點放喺拉弓肩胛骨 / 手肘伸展動作上，而非扣弦手指撒放。講法注重主動、操控，避免提及鬆。
3) 手指沿弓弦轉開離弦 / 弓弦推開手指
前者主動後者被動，都係講緊手指同弓弦嘅關系同互動。「手指沿弓弦轉開離弦」同上述第二類其實好相似，弓弦雖未至於繼續後拉，但絕對唔會向前縮，至少於空間位置不變。弓弦唔郁，郁嘅係手指，沿住弓弦轉開，盡力唔幹擾弓弦唔影響弓弦位置，呢個講法當然亦都無提及任何嘢「鬆」。
「弓弦推開手指」撒放，呢個做法我嘅意像係拉弓一邊變成holding而唔係主動後拉。因為前者弓弦先係主動，有繼續加力愈黎愈大力嘅感覺，後者手指只係被動，感覺唔係一直加力一直繼續後拉，反而係當弦推開手指時好似橡筋突然被拉斷，拉弓一邊手自然地向後走。
我並無覺得邊一個講法比另一個講法優勝或者正確，兩個講法都係專注喺扣弦手指，被動講法比較容易理解，避免亂咁用力，主動做法就好似比較能避免縮手。
「手指沿弓弦轉開離弦 / 弓弦推開手指 」兩個講法瞄述緊扣弦手指同弓弦嘅關系同互動，扣弦手指主動或被動離開弓弦。
同以往講其他動作技術唔同，以上講嘅三類方法並唔真正係身體運動肌肉操作方法，只係於意識上點樣去理解放箭嗰一刻到底發生緊咩事，係意像上嘅分別。三類講法喺實際操作上其實未必有大分別，外觀更加可能完全一樣。唔同嘅只係表達方法用字，執行時應該專注嘅重點，意象有分別會影響做出黎嘅效果，可能某一個諗法比較其它方法更有助你容易理解放箭操作，令到撒放更乾淨利索。我唔覺得邊個講法比邊個講法啱，取捨只係採用邊個講法可以幫助射手理解、做到想要嘅動作，所以教學時可以因應對像而選用唔同講法，而且即使係同一位射手，於唔同學習階段亦都可能需要採用唔同諗法。
對於放箭，仲有一個講法，就係放箭只係開始射支箭出去，用呢個講法係想強調要繼續做好動作唔好鬆，但如果說明得唔清楚就好容易引起混淆。The beginning of the shot我都係咁講，開始嘅係箭射出去呢件事，並唔係射手嘅動作。為免誤會，有需要搞清楚個時序。將箭射出去應該係弓弦開始向前走推支箭出去時開始，係把弓嘅事，並唔關射手事。射手嘅動作開始係於再早一啲，喺開滿弓瞄準時開始伸展 / 拉動響片 / 拉動撒放時開始，放箭係只係整個過程中間發生嘅事，係中途。留意唔好混淆咗放箭係動作開始，由靜止突然起動就會變咗郁 / 鬆 / 唔穩定，呢個並唔係放箭一刻我哋想要嘅嘢。
以上係我嘅認知、諗法，咁書本點講？斷章取意 Total Archery Inside the Archer入面出現過呢兩句：
There is no release
Imagine release never happen.
但放箭係真實發生緊嘅事，只係想像佢無事發生。咁撒放係點發生？Inside the archer解釋：
...the release is a non-action – it is a reaction. If finger pressure is maintained during expansion, holdinging intensity is controlled, and the body’s power is held deep with the core, then the release will just happen when the clicker goes off
完全避開唔講「鬆」嘅部份，強調力量維持，例如扣弦手指壓力、從身體核心發力、控制好支撐力量，當拉過響片時撒放就會唔知點解自己發生。
避開唔講放箭點樣發生，但文中有形容撒放時會點：
The hand and fingers then stay in this position as the shoulder and arm unit snaps back due to the holding forces of the back muscles. The holding intensity in the back keeps increasing...
扣弦手及手指唔郁，郁嘅只係拉弓手同肩膀，感覺同上述第二個講法類近都係主動去拉 / 伸展。文中亦都有近似第三類講法，提及手指係被弓弦推開：
The fingers cannot open in time to actively release the string – the string instead pushes its way through the relaxed but still curled fingers
中國體育教練員崗位培訓教材（射箭）指「滑弦撒放」係好嘅做法，滑弦撒放過程係：
在持弓臂前撐用力的基礎上，利用鉤弦手三指肌退讓的方式使弦滑離三指。
唔太理解肌肉退讓嘅意思，可能係想避開唔用鬆字，可能係大陸慣常語法，但我未聽過廣東話會咁講。除咗手指，文中亦有提及拉弓一邊動作：
由於後背肌群強（而）有力地收縮，使拉弓臂形成復原的自然反作用力，所以當弓弦離開三指時，帶動鉤弦手沿射箭面直接向後運動。
雖然無提過鬆，但可見到意像上拉先係主動，扣弦手指跟弓弦兩者都無主動性，弦只係自然滑離開扣弦手，總知就係發生咗。教材進一步指出撒放伸指並唔係靠肌肉用力做出黎：
在撒放時有一個伸指過程，其過程主要不是取決於伸指肌的收縮，而主要取決於屈指肌的退讓。退讓得越快，弦在手指上滑動的時間愈短，其效果就越好，動作就越顯得乾淨利索。
教材非常強調撒放重要性：
其質量如何是決定箭命中好壞的重要因素之一，我國古代稱其為畫龍點睛
所以亦都用咗好大篇幅詳細講解放箭，呢度我只係引述咗一小部份，用作對比上述三個放箭想法意像上分別。除咗上面提到滑弦愈快愈好，教材講解放箭篇章詳細分析包括撒放時機、撒放時鉤弦手、拉弓臂動作分析及要求、常見問題及處理方法等。講到咁詳細複雜，好似同「無放箭」距離甚遠，但要明白呢份係教練教材，教練教材有需要清楚理解，並唔等於話教運動員時有需要講到咁複雜。
奧運選手的基礎射箭知識資料入面嘅講法上面已經引述過，資料內有形容於放箭時手指係點（拉橡筋練習）：
Drawing-to-release increases the resistance of the band, deforms the passive hook-fingers into a less bent shape, and pulls them off the band
佢非常強調拉係主動，而扣弦手指係被動，因為拉力增加而將手指鉤拉開變直，最後從橡筋帶（弓弦）上鬆脫。文中亦舉了兩個例子，嘗試比較形象化去畀人理解個感覺：
The principle of release is similar to opening a Velcro fastening, or pulling a thistle bur off clothes: the hooks are pulled off the fabric, being completely passive themselves
撒放的原理就似撕開魔術貼，或者像拔除掉黏附在衣服上的植物倒鉤一樣，當中魔術貼同植物倒鉤都係完全被動無做過任何嘢。而魔術貼同植物倒鉤更加唔會向拉力嘅反方向移動，所以弓弦係唔會回縮。
最後睇吓Heretic Archer點講，呢個有少少似上述第三類諗法：
The sound of the clicker is received by the brain that will then send a command to the fingers of the string to relax. The string then escapes naturally from the fingers and starts to push the arrow toward the bow...
文中指出放箭係放鬆手指，弓弦就會自然鬆脫。同其他射法唔同，Heretic Archer建議伸展過響片方法係只推完全唔拉，書中當然有解釋只推比拉或推拉優勝嘅原因，不過如果喺呢度講就會有啲離題。因為只係推唔拉，呢個都影響放箭，書中分析放箭亦都有反映到呢個分別：
...the string will be already half way along its travel before the hand that has released it starts its own movement in the opposite direction. The main influence on the result of the release does not belong to the cleanness of the movement of the hand of the string at the release, but predominantly to the correct action on the bow side at the same instant
弓弦飛緊出去拉弓手向開始向後移可能理解，因為唔拉，後手變成holding，當失去弓弦拉力後，即弓弦已經離手後，手先會開始郁。亦都因為推先係重點，所以放得好唔好主要係因為推弓一邊做得準唔準，拉弓一邊放箭放得乾唔乾淨反而影響輕微。呢個做法我睇到嘅畫面係弓弦推開手指放，因為主動有動作嘅係前手推過響片，弓弦推甩開手指嘅力量就係源自推弓。
由呢個比較同一般嘅射法可以見到，我哋唔能夠抽一個動作環節出黎獨立分析，因為射一支箭動作程序係一個整體，而放箭點發生點做會因應伸展方法有別而有唔同，餘勢亦都唔係就咁做個動作出黎，而係會反映放箭前動作點做。初學拆開動作教學只係方法，整個動作程序都係要睇埋各部份關系先得。
放箭講多幾篇都講唔完，今次只係回想教學時用過咩唔同講法去表達畀學生知放箭呢件事，考慮應該點去理解放箭一刻發生嘅事，意識上點去執行，及專注力投放去邊等。其他相關事項例如時機、常見問題、扣弦手指以外嘅動作等，留番之後有機會再研究。