呢排幫一位裸弓射手解決黃心病問題，佢自知有黃心病問題，即使係射18米光靶，放箭都有啲失控。射裸弓自然冇瞄準器、無平衡桿，但射手有用裝喺弓片上嘅響片，不過基本上係響完先靠弦瞄準，並非一響即放，訊號響時亦都無回縮。同射手傾過，問過佢用乜嘢方法瞄準，主要係用箭頭對準黃心方法瞄準。觀察佢練習之後，建議佢做兩樣嘢，聽落可能無乜關系，但就有明顯幫助。
第一樣建議佢做嘅嘢其實非常簡單，就係拉多啲。喺開滿弓時將個人打開啲，撐開胸腔，收實啲背脊，令整個支撐變得實淨。無響片限制令到無需要考慮預留幾多力量同空間去拉過響片執行撒放，初時只需要專注收到近乎最盡，優先做到開滿弓時堅固穩陣就好，練熟習了之後可以再作調整。
佢失控嘅原因係未有拉至最長最大拉距，雖然手肘已經拉到直線，但身體並未有完全打開，於是開滿弓成個支撐都唔得實淨，動作浮吓浮吓自然無辦法瞄得準，見到感覺到唔隱定就更加無信心去射。好多時我哋留意推拉平衡及直線，但忽略了整個身體是否穩固，拉唔開晒、企唔穩、無連結上下半身，如果套用「奧運射手的基礎射箭知識」的內容，就係圖中腳、腹到推弓點灰色陰影位置三點支撐未有做好。呢個先係令佢將瞄準連結放箭，建立錯誤條件反射，引起黃心病嘅根本原因。
除咗拉多啲，另一樣建議佢做嘅事，係喺開始瞄準後，畀少少力推，意象上控制將弓推向黃心。推嘅過程時間雖然唔長，但可以製造一個時機，令到成個人變得更穩固實淨，同時弓亦會短暫更加穩定地指向瞄點。咁就有望切斷瞄準同放箭嘅直接關系，同時增加射手信心，有信心就自然能夠更放膽執行動作，更加穩定。最終係唔係要咁射並唔係重點，可能只係一個階段或者一個訓練方法。
無獨有偶，隔咗無幾耐又遇到另外一位射手有黃心病表癥，原因一樣係開滿弓時支撐唔夠實淨，浮再加上要瞄準就引起問題，但就唔係拉多啲就能夠解決。
案例其實已經講完，下面只係老人家長氣咿咿哦哦。
隨便上網搵吓黃心病嘅解決辦法，見到一條影片裡面提供咗三個練習方法：第一將瞄準器準星換做一個無中心點嘅圈；第二換張大啲嘅靶紙；第三唔好用響片，專注去感受點樣射好一支箭唔好畀響片限制。方法係藥物，呢三隻藥好正路好合理，對付其他黃心病嘅情況會有用，而我自己最常用嘅方法通常都係第一個：換咗粒準星先，呢個做法對好多人嘅黃心病狀況都會有幫助。 但明顯就上述裸弓呢一個案例黎講，本身已無瞄準器、無靶紙、無響片，就完全唔關事。
對症下藥唔容易。好多時我哋見到嘅問題只係病癥，實際發生緊咩事，或者病症係由於乜嘢引起，個原因先係需要去理解並解決嘅問題。呢啲問題好難就咁單靠上網搵吓資料，睇吓youtube 就可以輕鬆解決。
呢排遇到另一個情況，有另一位射手好清楚知道有一啲問題，佢知道、亦都想係開滿弓靠弦時，準星剛好對準瞄點，但係佢做唔到，拉開把弓時準星都係會低過黃心，想我畀個方法幫佢解決。引起問題嘅背後成因唔一定好直接，有可能係拉弓前預備動作無做足，有可能係肌力、關節活動幅度之類嘅體能問題限制咗動作，亦都有可能關器材事，並唔係三言兩語就解釋得清楚，更加唔係簡單話叫射手專注去做準拉弓個軌跡就可以解決。
其實相類似嘅情況太常見，運動員總係會知道要做一啲嘢，但係做極都做唔到。要清楚知道問題成因就比較難，如果係身體質素體能令到唔能夠做到件事，解決辦法自然就唔係去搞個動作，而係要先練好啲體能，無論你幾勤力去練箭，不斷去射個錯嘅動作都唔會有幫助，急都急唔嚟。如果係受到器材影響，自然係要先搞掂件器材，郁動作去遷就器材只係本末倒置，更壞情況甚至乎係自己破壞緊個原本好地地無問題嘅動作技術。
所以如果要認真地玩射箭，有問題一律建議搵教練，唔係話自學一定唔得，不過通常會走多好多冤枉路，而且成功嘅機會必然低好多。教練對眼就係值錢嘅地方，你睇到嘅係問題，教練睇到嘅係問題成因，有經驗嘅教練再按原因提供合適嘅解決方案同訓練方法。當然，由初學開始就學習正確嘅嘢，點都好過有錯之後再去修正，不過呢個係非常完美嘅情況，理想到近乎無可能發生。
最後附上一篇關於黃心病嘅論文，好少有針對射箭運動嘅研究可以搵到：
Archers’ experiences of target panic: aninterpretative phenomenological analysis