今年打咗幾場比賽，感受到英國確實好大風，啲箭一吹就唔知飛咗去邊，特別係有一場打WA1440有90米，用大毛真係好蝕，於是就有個諗法想，睇吓射返細毛會唔會對整體分數有幫助。
已經用咗XS Wings 60mm low profile大毛好耐，呢個選擇係試用過唔同毛得出嘅結果，Spin Wings / Spin Wings Elite之類同 60mm low profile XS Wings比較，我用後者時明顯射得集中好多。所以如果轉用細毛，已經預咗無風好天時分數會低少少，但由於呢度成日都有風，如果大風時準啲，一加一減可能都會對整體分數有幫助。
就以上呢個諗法，買咗包Jet6 1.75吋黎試。Jet6賣點係話reduced air resitance and optimized airflow as the arrow move / Perfect Adhesion Desing / Enhanced Durabiliry （官網自己有錯字）。預計Jet6風阻係會比XS Wings 60mm low profile細好多，但又未至於好似Spin Wings咁細。係咁意量一量，10塊XS Wings 60mm Low Profile已經超過1克重，而20塊Jet6 1.75in先得大概1克。不過亦有聽人講Jet6轉得好慢，所以雖然Jet6細條又輕，但可能都係會傾向似XS Wings 60mm Low Profile多過似同佢一樣尺寸嘅1 3/4 Spin Wings。
我只係將新箭裡面半打換毛，另外半打保留大毛，之後每首箭兩種毛分別各三支隨機射出去睇落點。盡量令到兩種箭受環境影響都差唔多。試用第一日已經唔太喜歡，風唔算大，但70米Jet6集中度明顯較差，最唔預期嘅係Jet6咁細條但風阻非常大，竟然同XS Wing差唔多，箭落點並唔比XS Wing高幾多。而於大風時Jet6就一樣吹咁遠，並無比較XS Wing好。
之後撞啱打風，咁就再試多次畀多一次機會Jet6，方法依舊係70米一首各三箭隨機射出去，雖然大風，但完全唔做任何aim-off，因為自己aim-off判斷一定係依據射XS Wings經驗去做，亦都盡量唔做任何修正動作，單純睇箭會射去邊被吹到幾遠。總共打咗12首，結果Jet6表現並唔算太差，整體箭集中度係比XS Wings散啲，但於好大風時射中機會係比較大。不過結果都唔足以令我轉用Jet6，因為好天時集中度真係差太遠，而於風中表現優勢又唔明顯。
Jet6有佢嘅好處，例如痴毛係方便，比Spin Wings更容易處理，而且我見啲箭飛得明顯比用XS Wings直飛得好，某程度可能係佢標榜嘅optimized airflow as the arrow move。 不過有聽過Jet6缺點係唔耐用，同佢自己講嘅相反，因為只要一有些微損耗，佢個擾流就唔work，甚至乎會飛得仲衰，所以一見損壞就要換毛，不過呢個只係聽聞，我暫時未爛毛未有感受。
另外Jet6有一個版本叫Jet6 S，其實就係無咗擾流條坑，咁佢只係變番一隻普通嘅curly vane，如果係咁我就無興趣用，我會用揀番好多人用、用咗好多年、有好好成績保證嘅Spin Wings，所以我今次試都係試原版而唔係S版。
器材需要配合射手，今次測試結果只係Jet6唔夠XS Wings啱我用，唔代表佢無咁準。記錄想要轉器材嘅諗法同原因、測試方法同考慮嘅因素等，參巧價值比測試結果本身高。做呢類型器材測試限制多、花時間 、好難做得科學，如果要更準確嘅測試結果，可能需要將全部箭一次過換毛射出去睇，但咁又會令到箭受環境影響無咁相近，因為並唔係同一時間射晒兩款箭出去做比較。另外換毛之後最理想應該要tune箭，同埋調準星， 咁先可以令到箭群最集中，但問題一樣係需要分開時間射兩款箭毛，受環境、射手狀態影響較大，呢啲都係測試時需要取捨，無辦法做得完美嘅限制。