先前IG出咗個poll，問大家覺得推弓方向係弓指住嘅方向、拉力直線(Draw Force Line DFL)嘅方向、定係從來都唔推。結果有55%人揀弓指嘅方向，31% DFL、14%唔推。點解會出呢個poll？並唔係我有咩正確答案，而係我真係想知大家點理解推弓。
而有呢個疑問係因為當我練習時思考自己動作技術，發現有啲基礎觀念需要厘清。所以今次呢篇個真實個案係我自己嘅個案，先戴個頭盔呢個唔會係好常見大家都會有嘅問題，同時成篇文嘅內容只係我尋找方法解決問題過程中嘅諗法同嘗試，但最後結果係同呢個過程無直接關系，所以成件事參巧價值應該都幾低，當聽吓故仔算。
首先解釋一吓我自己嘅理解同做法。我有好長一段時間以年計係完全唔推弓嘅，呢個係因為先前用嘅一把弓完全唔需要推，拉開之後唔亂畀力佢，單靠拉力佢就會自動回番中線對準，推力反而增加幹擾到把弓方向嘅可能性，瞄準時把弓會變得唔穩定，箭射得唔集中，即係係唔推好過推。更甚者為免幹擾到把弓，唔單止唔用力推，就連整個肩關節都係處於好放鬆嘅狀態，只係保持最低限度用力令到肩關節對位就算。你可能會話有無搞錯？從來都係話推拉平衡50% 50%，點解會100%唔推？我同意呢個並唔係普遍做法，但有超過5年我基本上都係咁射箭，當中亦都包括我射得最高分嘅時候。當時用嗰把弓嗰埋器材係特別嘅，特別到當把弓成為過去式時我無辦法可以set到tune到第二把弓相似，其中我估計同reflex deflex (bow geometry)、弓片直唔直、弓片抵受扭曲能力、握把、平衡桿系統等有關，係所有嘢加埋做成。
整唔到另一把差唔多嘅弓結果係我唔再可以唔推弓射，由於長年養成唔需要推，甚至乎唔推射得更準嘅習慣，我發現我唔識推，而且無一把弓就手用得舒服。近幾年一直搵方法推，同時亦都更清晰理解到自己原來射法推弓一邊肩關節完全放鬆會有嘅問題，即使喺射得最好嘅時候，完全唔推依賴把弓自己定位無風時就好地地，但前手穩定性始終比較低，一有少少風就會無辦法維持動作，抗風能力係零。
要推弓自然需要考慮推弓方向，我一向理解都係推向弓指住嘅方向，呢度有一個細節位需要特別留意，有時我哋以為弓係指住向靶，呢個講法並唔準確，弓指嘅方向係隨射距改變，射距愈遠弓指得愈高，一直都指向靶嘅只係準星以及眼、準星同靶三點拉成嘅瞄準直線。我個poll問題可能無講得好清晰，唔知揀答案一推向弓指嘅方向嘅朋友當中，會唔會係有部份混淆咗瞄準直線？
雖然我意象中係推向弓指方向，但執行上我從來都無辦法推得穩肩膀。我哋知道推弓唔係真係有郁動，只係靜態地加力而拉距不變。
World Archery Coaches Manual Entry Level咁講：
This is an isometric push, without extension of the bow arm or elbow.
...with no forward displacement of the shoulder – just maintaining the bow shoulder in its original position...
Total Archery Inside the Archer：
the archer would press the force of his bowarm at his target (only intensity control. No actual movement take place)
因為射極都奇奇怪怪，再想搞清晰啲點推弓，特別係推嘅方向，發現並唔係咁多人講。可能係為避免受眾誤解亂推，好多時都只係強調支撐，好虛無地hea過。有提及方向都可能只係支撐方向，或者舉弓前後畀力嘅方向，鮮有好肯定咁指出伸展時推嘅方向。
「奧運選手的基礎射箭知識 」資料入面息提及舉弓時係：
保持沉肩，將已經完全前伸的推弓臂舉高至對準瞄點位置（當使用橡筋帶時，以推弓點代替準星對準瞄點）
World Archery Coaches Manual Entry Level嘅講法差唔多：
The archer should set their shoulder low and push towards the target
Total Archery Inside the Archer：
...bow arm is extended forward, towards the target
呢個講得詳細少少，有話撒放時推弓臂需要保持指向靶方向：
the bow arm stays straight into the target while the wrist projects the force of the bow forawrd, out and down
似乎都係講緊推向靶嘅方向，唔考慮射距改變時嘅差別，但我又覺得文字依然未有非常明顯精準地指出一個方向，似係講緊執行動作時嘅感覺多啲。
雖然（我覺得）部份資料文字上見唔到有一個準確講法，但可以從圖片上見到多少少嘢。「奧運選手的基礎射箭知識 」資料內示意推弓方向箭咀係同持弓臂成一直線，所以即使推弓方向唔完全係弓指住嘅方向，都肯定係隨舉弓角度而改變。
但WA Coaches Manual Lv2示意推弓方向箭咀就唔係同持弓臂成一直線，亦都明顯唔係弓指嘅方向，單純係指向靶。可見係另一個做法。
無論係推向靶方向不變或者係推向弓指嘅方向隨舉弓角度改變，我都推唔定，咁我就諗另一樣嘢，我哋有拉力直線講法Draw Force Line(DFL)講法，既然力嘅方向通過推弓受壓位置、拉弓食指中指之間及拉弓手肘三點，咁推嘅真實方向會唔會可以係沿DFL走？搵唔到有資源係咁講，其實連DFL本身都唔係咁能夠搵到。WA Coaches Manual Lv2講伸展時有提及過line of power，係同DFL同一件事：
During the process of release and follow through the drawing hand should continue along the line of power that was set-up during the extending procedure. This line is from the pressure point on the bow pushing hand, through the drawing hand fingers where they are located on the string, to the point of the elbow of the drawing arm
不過佢都只係講拉弓一邊方向，推弓一邊執行方法都係無講。而其他我慣常會參考嘅資料，都係無提及過DFL，至少唔係用咁嘅講法去解釋動作。
試吓無壞我就走去沿DFL推測試一吓，發現即刻射準咗，動作上撒放後前手會跌得比較低，弓轉嘅幅度比較大，但呢個跌並唔係放鬆自然跌手，而係有方向受控嘅餘勢動作。不過可能因為動作未控制得精準，做唔好時箭就容易打低。
我相信兩種推法都可以射得好準，並無話一個比另一個優勝，因為整個動作加上器材都會影響最終較果，如果動作做得完整，感覺就會係好似下面兩組動作咁。
我唔知道兩位射手推弓嘅意象同真實方向係唔係有出入，但兩者撒放後動作明顯反映用力方法有大分別，可能係因應體形骨架個人差異所以採用唔同技術，而究竟係喺基礎理論認知上已經有分別，定係單純操作執行上令外觀唔同，就無從得知。
有無人係沿DFL方向推弓，好彩從個poll得知都有唔少，因為我真係搵唔到任何資料有類似嘅講法，如果有射手教練見過請話我知，我會補上資料出處畀大家參考。而正正因為搵唔到有資料講過咁做，我其實非常疑惑呢個做法合唔合理，一般我都唔會覺得正常人可以發明到一啲新嘢、諗到一啲新方法新技術而又真係行得通。正常無人做嘅嘢或者無教科書教我傾向假設佢唔可行。只係我哋唔知背後個原因。見過唔少射手教練做啲奇怪嘢，通常一係唔work，一係唔差但亦都唔係好過已有做法，長遠有無問題就要等好耐以後先知，仲難過試藥試疫苗。
雖然對動作有懷疑，但射準咗又好吸引無得呃，並唔係一首半首一日半日，係好明顯有改善。於是再考慮兩個方法嘅分別，因為推向DFL時感覺動作更可控，撒放時弓向前跳方向感更強，應該係某啲位變得更穩定所致。對比之前無辦法推得好，發現差別係源自腋下，當我推向靶或者弓指嘅方向時，撒放就無辦法完全保持收緊，即係肩關節放箭時會鬆，但當我推DFL時就可以保持收緊甚至繼續加力。呢個係我唔為意嘅問題，原先射法放鬆晒當然唔覺得有幾用力，但開始推弓後我已經有用多咗力控節肩關節，加上無縮膀、身體無傾側、拉距無改變（其實原本唔推時都無），並唔覺得自己放箭時有鬆。但有比較有傷害，當我嘗試推向DFL時就明顯感覺到差別。所以暫時結論係有需要收好腋下肌群控制好肩關節，推向DFL只係畀我一個機會發現問題同提供一個方法去改善，唔代表唔推DFL推向靶就一定會鬆。相反一般正常學習從來都有推弓嘅射手，可能根本唔需要考慮推嘅方向，無論係推向靶、弓指嘅方向定係沿DFL推，都可以做好唔鬆。
最後，出poll時有教練指出，我只係考慮緊單一平面上下方向問題，未有考慮水平左右方向，例如意象上係從右上推入黃（右手射手），由2點8分推入去10。呢個又係一個好有趣嘅題目值得研究，但今次就先唔考慮，因為同我自己射法唔大關系。