我唔覺得教練係一個好容易會被AI取代嘅職業，空有知識唔代表能夠應用，教練對眼先係最值錢，有經驗嘅教練唔需要通過太多思考分析就夠搵到（或者估到）一個比較好嘅訓練方法或者解決問題方案，亦都可以係更能掌握大局清楚大方向，知道先後資序，唔係一見到射手有咩問題就即刻講出聲指責。唔覺得呢啲短期內AI可以幫到好多手。但喺就資料搜集或者要多啲邏輯嘅嘢例如制定訓練計劃，對AI能力有好大期望。之前試過後者叫AI幫手制定訓練計劃但唔係太成功，可能係我指令畀得唔好，又或者用唔啱AI，今次前者用黎搵資料結果又幾好。

我用嘅係ChatGPT with the Research Assistant tool, powered by GPT-4-turbo, which is the version of the model used in ChatGPT Plus as of 2025。問問題時撳「工具」再揀「深入研究」，免費account有使用次數限制。ChatGPT話呢個version allows for enhanced browsing, multilingual search (English and Korean, in this case), and aggregation of credible sources including academic papers, interviews, and media reports.

當然就咁問係唔夠準確，畀指令時要多啲指示同規范，上面佢解釋個version可以做咩，亦都係同我問佢問題時畀嘅指令有關。我嘅問題大概係研究韓國射手點樣去應對比賽壓力，包括：

1) 用咩方法去模擬比賽環境壓力；

2) 如何提升抗壓能力；

3) 如何從「壓力下失常」（choking under pressure）中恢複；

4) 有咩訓練方法；

5) 運動員會用咩辨法、心理技巧或者程序保持專注，應對壓力；

6) 運動員專注射箭動作程序內哪些環節，或者於程序內加入咩要點以協助於壓力下保持表現；

7) 運動員擁有的心態特質及持有的信念

反反覆覆幾個point其實差唔多，只係想令到AI畀嘅答案更加聚焦。

就上述問題，指令係要AI收集及整理精英運動發展資料，而關於搜尋資料方法，我就畀咗呢幾個指令：

1) 要搜尋英文及韓文資料；

2) 要使用英語地區例如美國及南韓慣常用的搜尋方法去搜尋資料；

3) 搜尋包括但不限於新聞、其他媒體報導、運動協會資料、地區及國際組織資料等；

4) 只包含精英運動程度的資料，例如奧運、殘奧、國家級教練及國家隊的資料

最後一部份指令關於報告，分析資料結果需要：

1) 將資料歸類；

2) 於報告內列出相關運動員姓名及主要成就；及

3) 列出參考資料來源

畀晒指令並唔係就咁食花生等睇結果，ChatGPT問咗四個問題等我答案先開工，即係我啲指令未夠詳細精準，呢四個問題懶得番譯直出：

1. What is the time range you'd like me to focus on (e.g., the last 5 years, 10 years, or all available data)?

2. Should I include both male and female athletes?

3. Do you want academic/peer-reviewed journal articles prioritized, or are general news and interviews equally important?

4. Should I only include Olympic and Paralympic archers, or also include world championship-level competitors who may not be Olympians?

咁答番佢時間由2010開始、男女都要、所有資料重要性一致、同包括世錦及世界杯決賽程度運動員之後，佢就開始做嘢。最後ChatGPT用咗6分鐘去處理呢個問題，相比之前問另一樣嘢，用另一個功能「思考較長時間」，我覺得佢今次都非常認真工作，因為上次落一堆指令叫佢諗耐啲，佢都只係用咗唔夠3秒就畀答案我。

佢整理完畢就出咗呢份報告：

How elite-level Korean archers handle sports performance anxiety

第一個最大問題係個標題錯咗，Simulating Competition Conditions (Preparation)只係內文第一部份，呢個亦都係我覺得成份報告其中一個最有問題嘅地方。

睇番內容，其實AI真係好幫到手，唔好話6分鐘，靠自己60分鐘都搵唔到呢堆資料出黎。佢搜尋到參考嘅資料包括2018年嘅運動員訪談、又有科研論文、亦都有韓文嘅資料，呢啲全部我都唔覺得我可以好輕鬆就搵到出黎。

不過我今次落嘅指令並無辦法令佢搵到好完整嘅資料，例如我哋好肯定心理訓練有好多方法，報告入面都無提及過，好似利用生物回饋做訓練就只係簡單一句sensor feedback就hea過咗。搜集資料都算唔錯，整理分析我覺得55波，判斷唔到佢做得好唔好，留番畀大家睇完份報告自己評價。但我見到佢有個位係9唔答8，於training drills & exposures嘅high-tech training入面佢提及bullet-proof buses，係錯誤解讀資料。明明其他列點AI都有註明出處，但呢句嘢佢就無講係引用詳資料去寫，暫時如果AI無列明出處，搵唔到地方考証，一律當佢亂噏安全啲。我自己再去搵吓，其實係搵到報導講緊Hyundai支援韓國隊科研技術訓練器材及場地，同時Hyundai亦都有提供交通工具支援畀韓國隊，包括客製化巴士及防彈車，但呢個係同訓練無關。再跟進叫佢釐清呢一點，佢都有修正，而且有一點都合理，提供交通工具支援令到運動員更安心，呢點都算係間接有助比賽表現。

最後都需要指出，搵資料學習知識只係第一步，後續問題係點應用知識去做訓練。盲目跟從人哋方法自然唔可行，唔好話正常人唔會有錢有資源去複製個奧運決賽場出黎，就算收細範圍到只係講運動員將專注力集中於身體姿態、平衡及呼吸上，效益都係因人而異。如果技術水平未到，可能真係需要集中注意力去某啲技術重點上，表現會比較好。反而通過AI整理出黎嘅資料，留意個大方向、理念會比較重要，例如於訓練時需要模擬比賽環境壓力、一啲提升抗壓能力手段、慣用心理技巧及訓練方法、及頂尖運動員嘅心理特質共通點等。唔係要諗頂尖運動員諗嘅嘢，而係要諗點解頂尖運動員會咁諗嘢，係咩背景、咩訓練同經歷建立出佢哋嘅信念。

運動心理不嬲唔係我強項，唔講太多。呢篇重點係分享我今次問AI問題嘅經驗，畀啲咩指令AI做嘢。如果有朋友用開AI，見到我問問題有咩問得唔準確，或者有更完善指令可以分享，歡迎留言或者PM話我知。

1. Qualification rounds were reduced from 72 to 60 arrows.

2. The X-ring was scored as 11 points instead of 10.

Competition at the top of the compound leaderboard has gotten tighter and tighter over the past few years, with separation in qualifying and (more importantly) matchplay, becoming minimal. (World Archery) The introduction of the 11-point X-ring is expected to increase score differentiation.

This analysis investigates the actual impact of these changes on both the qualification and elimination rounds. Projected ranking scores under the previous system (72 arrows with X counted as 10) were calculated using each archer’s average arrow score. Only results of top 32 rank archers are shown here.

Impact on Qualification Rounds

As anticipated, the impact of the new scoring system is most noticeable among top-ranking archers. This effect is more pronounced in the compound division, particularly among men, due to narrow scoring margins where X-counts often determined rankings. With Xs now scoring 11, several archers experienced significant shifts in their qualification rankings—some by more than 10 places. In contrast, the recurve division saw relatively minor ranking changes, typically within 10 places.

A noteworthy case involved a men’s compound archer who fell outside the top 64 and thus did not advance to the elimination round under the new rule. Under the previous scoring system (X as 10), he would have qualified.

Impact on Elimination Matches

There were a total of 358 elimination matches across all four categories. Of these, 81 matches (22.63%) were affected by the scoring rule change.

Affected matches were defined based on the following criteria:

1. Winner and loser reversed (excluding tiebreaker/shoot-off scenarios).

2. Matches changed from settled to tied, resulting in:
   2.1. Original winner winning via shoot-off.
   2.2. Original loser winning via shoot-off.

3. Matches changed from tied to settled (shoot-off not held, so winner unknown).

4. Matches settled earlier than under the previous rule (recurve only).

Limitations and Methodology

• In case 2.1, although the winner did not change, the match state did. These cases are still counted as "affected."

• In case 3, because no shoot-off occurred, it is impossible to determine whether the winner would have prevailed. Thus, all such matches are counted as affected.

• In recurve matchplay (which uses a set system), matches requiring more sets under the new rule are not considered affected if the winner remained unchanged.

• For case 4, although a match may have ended earlier, the actual impact on the outcome is uncertain. For instance, a result of 6:0 might have been 5:1 under the old rule, likely preserving the winner.

Summary of Affected Matches

• Recurve: 39 of 195 matches (20.00%) were affected.

• Compound: 42 of 163 matches (25.77%) were affected.

As expected, the compound division exhibited a higher impact due to tighter scoring margins. The compound men’s individual (19 of 64 matches; 29.69%) and compound men’s team (7 of 16 matches; 43.75%) events were most affected.

Although one might expect later-stage matches (e.g., 1/2, medal matches) to be more impacted due to their competitive intensity, the data does not show a clear correlation between the round of play and the likelihood of result alteration. Affected matches were distributed throughout all elimination rounds, from the 1/32 stage to medal matches.

Nature of Match Result Changes

Cases where the match winner changed (case 1 and 2.2) were relatively few, especially in recurve. Specifically:

• Recurve: 11 of 195 matches (5.64%) resulted in a change in winner.

• Compound: 18 of 163 matches (11.04%) resulted in a change in winner.

In compound matches:

• 19 matches (11.66%) were shifted from tie to settled (case 3).

• 8 matches (4.9%) shifted from settled to tie (case 2).

This suggests a general trend of matches being resolved earlier and with fewer arrows.

In recurve matches:

• 7 matches shifted from tie to settled (case 3).

• 18 matches were settled earlier.

  • Total with fewer arrows shot: 25 of 195 (12.82%).

• 8 matches shifted from settled to tie (case 2).

• 8 required more sets to resolve.

  • Total with more arrows shot: 16 of 195 (8.21%).

This indicates a slight overall tendency for recurve matches to be resolved more quickly under the new rule.

Highest Match Scores in Compound Division

Under the new rule, the maximum possible score in a 15-arrow match is 165 (if all Xs are hit).

• Men’s Compound Individual: The highest recorded score was 162 by Kim Jongho (KOR) in the 1/32 round—equivalent to a perfect 150 under the previous scoring system.

  • Ten matches achieved a perfect 150 (X = 10) under the old rule.

• Women’s Compound Individual: The highest score was 161 by Becerra Andrea (MEX), who scored one 9. Her score would have been 149 under the old rule.

  • Both Becerra and another archer achieved a perfect 150 once under the old rule. However, due to fewer Xs, their scores under the new system were 158.

This raises a potential thought in archers performance: should archers focus on consistency (grouping) or precision (hitting the X-ring)?

Conclusion and Personal Perspective

The reduction in qualification arrows from 72 to 60 appears to have had minimal impact compared to the change in X-ring scoring. The shift to scoring the X-ring as 11 points has introduced significant variability, particularly in the compound division, affecting qualification rankings and match outcomes.

Personally, I am neutral regarding the reduction in qualification arrows but am critical of the change in X-ring scoring. A more subjective honest review in Chinese is available at the following link:

WA突然間喺2025世界杯第三站內測試新計分方法，將排位賽由72箭減短到60箭，而「X」就當11分計算而非10分。

作為一個老屎忽，轉變係好難接受，因為本身已經好清晰概念將個分數聯系咗去射手表現好唔好、箭集唔集中，呢個關系已經係唔需要經過思考已經知道。突然間改變咗呢個多年建立嘅經驗同直覺，就咁睇住個分我都唔知代表咩，嗰日天氣好唔好？整體打成點？或者個別射手當日表現如何。

咁究竟呢個賽制及計分數改變，對射手嘅成績有無咩特大嘅影響？將啲分數打落spreadsheet度睇下，將X計番做10分重新排過排名比較，又將60箭分數用箭平均分乖番大變做72箭，排位賽得出黎結果係咁（圖只顯示至32名，完整排名轉變放咗去本文最尾pay wall後）：

當然排名會有升有跌，排頭嘅射手特別明顯，本身射手們分數好接近，將X當11分計算就可以拉返開個差距。而複合弓射手排名嘅轉變都幾犀利，唔係上落一兩名，而係可以上升十至十幾名，跌就通常小啲都係跌幾名。反曲弓就無咁誇張，上落都係十名以內，一黎同樣係高排名射手，即使X計10時總分都已經差一分半分唔係完全同分，二黎打X嘅總數量無複合弓咁多，有能力打到十支以上嘅射手都已經係頭排，相反複合弓排頭嘅射手打到廿幾支X，十支都無已經係排尾。

另外一個值比較需要關注嘅位係會唔會影響到晉級淘汰賽，即係名次64、65附近。如果個排名本身都已經係咁上下，其實打X嘅數量並唔多，而且分數差距本身已經拉得闊，所以都無乜影響名次，今次男女反複四個比賽個組別加埋都只係得一名男複射手如果X計10可以排頭64，但計11就入唔到淘汰賽。

就咁睇呢個計數方法嘅改變，其實又好似對個排位冇乜大影響，最大影響可能係令觀眾容易已睇咗。另外一個諗到嘅影響係對排頭頂尖嘅射手做成更大心理壓力，特別係複合弓射手，因為會令到自我要求更高，更著緊打唔得到X，以往X同10分別無咁大，而家差別就明確好多，直接影響個總分及排名。

更重要係對改變淘汰賽結果有咩影響，自己諗無意義，將所有分入落電腦計一次。原本諗住搵AI計，點知呢個算係分析，免費版本每日只限10條計算，最後變番自己人手做，比預期中用多咗非常多時間。

睇數字前先望多一樣有趣嘅資料，就係複合弓滿分，因為X計11環，15箭滿分變成165環，咁最高分係邊個？男複係KIM
Jongho(KOR)於32強賽事做出 嘅162環，如果X計10就打滿分150。女複係BECERRA Andrea(MEX)於32強賽事做出 嘅161環，不過佢係打咗一支9環。如果X唔係計11環，BECERRA Andrea(MEX)同另一名女複運動員都打過一場150滿分無9環，但因為X少所以只係得158環。而男複就多好多，總共出現過10次150滿分。

呢個位幾值得思考，究竟我哋需要射得穩定唔犯錯，定係射得好準但容許出錯？射得穩定箭群集中，並唔代表射得超級準，箭群可能散散哋入晒10環，複合弓咁就可能係150滿分，或者反曲弓3箭一局咁就30滿分。過往呢個已經滿分無得輸，但而家多咗個11分，情況就未必一樣。高專注集中射得好準，即使無咁穩定有機會犯錯，打兩支X一支9就31分，雖然打失支9但都贏你散散哋圍住入10無X。呢個就賽制轉變嘅現實影響，有少少似舊時打Double FITA（而家叫WA1440）排位轉做雙70，箭數減少，又或者反曲弓淘汰賽打12箭總分變做打局勝制3箭一局，趨勢都係要準多過要穩。

所有組別個人團體對賽，加埋總共有358場，將X計算為11環時，其中81場(22.63%)對賽賽果會受影響，變得同X計10環時有唔同。賽果會受影響包括呢幾樣可能：

1. 勝負逆轉

2. 於局內分出勝負變成賽和，需要打附加箭

3. 需要打附加箭變成於局內分出勝負

4. 提早分出勝負（反曲弓局勝制下提早取得足夠局分勝出）

當然大家睇嘅嘢有機會唔同，可能覺得我計法唔準確，呢度有四點想要釐清：

1. 於局內分出勝負變成賽和，需要打附加箭時，最終勝出單位可能不變，即其實最終沒有影響晉級。但不論最終勝負，只要由局內能分勝負變成要進入附加箭，我都當做賽果受影響；

2. 由原本需要打附加箭變成於局內分出勝負，由於打和shoot off並無真實發生過，所以我哋無辦法判斷晉級射手有無變，只能夠全部當賽果受影響；

3. 於反曲弓局勝制下，即使打多了局數，如果最終勝出單位不變，同時未需要進入附加箭，例如由原本6:0（三局）變成7:1（四局）。只要同時符合呢兩點，我就唔會當賽果受影響；

4. 提早分出勝負一類其實亦都有斟酌，其實就算未分勝負，可能都只係局分6:0同5:1分別，就算打多局結果好大機會都係一樣，唔影響晉級，不過呢個就會計算做賽果受影響，因為落後都仲有機會反勝。

反曲弓受影響對賽結果係39/195場(20%)，比複合弓42/163(25.77%)少，呢個應該合符大部份人預期，因為複合弓已經趨近滿分，而家X畀多一分射手，就容易拉開分數，令到對賽射手分數有更大差別。當中男複最明顯，個人19/64場(29.69%)及隊制7/16(43.75%)賽果受影響，分別係所有項目當中排第一二名。

如果對手分數相近，所以X計11更能決定勝負，可能會諗隨比賽進行愈接近獎牌賽，選手理應排名愈高能力愈接近，所以新計分方法有更大機會影響賽果。但就數字我睇唔到呢點，因為無論反曲弓定係複合弓，由64強開始一直去到獎牌賽，賽果都受影響，我睇唔到受影響機會同淘汰場次有關系。

詳細睇吓受賽果影響嘅類型，我會話直接逆轉勝負場次並唔多，尤其係反曲弓，就算計埋要打附加箭之後賽果逆轉，總數都只係有11/195場(5.64%)，複合弓多啲有18/163場(11.04%)。上面講過呢度有個限制，我哋無辦法知道由打和變成於局內分出勝負嘅場次，晉級選手有無分別。

複合弓場次由原本打和變成局內分出勝負總共有19/163場(11.66%)，相反原本局內分出勝負變成要打附加箭有8/163場(4.90%)。即係打少咗箭，快啲贏/輸嘅機會大啲。

反曲弓因為用局勝制，並唔係一定打足咁多局，所以情況會比複合弓複雜。由原本打和變成局內分出勝負7場，提早打完（打少啲局數）18場，合共25/195場（12.82%），相反原本局內分出勝負變成要打附加箭有8場，遲咗分勝負（打多咗局數）有8場，合共16/195場（8.21%）。同樣係打少咗箭，快啲贏/輸嘅機會大啲。上面講過只要晉級一方不變，仍然於局內分勝負無需要進入附加箭，我就無當係賽果受影響，即係呢度嘅8場「遲咗分勝負」並無計算到受影響場次入面。

總結，我覺得X計11分呢個轉變：

1. 對排位影響輕微；

2. 對晉級淘汰賽影響近乎零；

3. 對賽較容易分出勝負，射少咗箭機會較大；

4. 受影響場次同淘汰賽進情無明顯關系，初段至決賽都有對賽都受影響；

5. 要求射得更精準而唔係更穩定

   ---

今次都算係一個幾大嘅改動，我就唔鍾意呢個轉變， X計11分最Kam嘅地方係要旁述人哋打perfect scores10 10 10嘅時候點樣講？另外有好多射手計數都超弱或者好唔鍾意計，一係推畀人計，一係計錯晒，而家仲難計咗分實際操作上唔知有無影響。

舊時WA都試過改變一啲賽制而最終係失敗，大概喺2010年，當時仲叫FITA唔係WA，複合弓試過改做淘汰賽打hit or miss，靶紙中間10cm直徑嘅黃心係hit，外面係一大個紅色圈、成張紙係藍色，所有位都係miss。 最後因為比賽令到好多高排位高排名嘅射手於淘汰賽一早就畀人篩咗出嚟，最後就放棄咗呢個賽制。講番今次，既然X計11分對成績排名冇大影響，我估我哋呢類老屎忽like唔like都唔係WA考慮嘅因素，而且無論佢點改變老屎忽都唔會棄坑。但如果呢個轉變真係有助觀眾更容易睇得明個比賽，咁呢個賽制就好有可能會繼續行落去。

而縮短到打60箭排位都有講過係因為想加速成個賽程，呢個我覺得合理，因為打咁多箭都冇意義，而且搞一日比賽如果想擠壓時間上午打排位下午打埋淘汰，時間都真係幾緊逼。同埋世界各地未必所以地方都適合或者容易完全一整日緊逼嘅賽程，係有需要改善一吓，例如有時天氣惡劣要暫停一陣；有啲地方日照短；又有啲地方好熱，中午有幾個鐘唔可以進行室外活動，需要暫停賽事休息，咁減少排位賽嘅箭數都係一個好合理嘅辦法。

X由計10變成計11對排位成績升跌影響，同埋每場淘汰賽分數所受影響，重要嘅分析及總結上面已經講晒，啲raw data就放咗Pay wall下面，應該就無乜好睇，當係bonus：

Read more

講吓故仔，近日見香港新聞遊學團接連出事，諗起以往帶隊一啲故事，一啲特發意外，已預期或者唔預計嘅情況。先需要講明呢篇並唔係教學，只係講故事，故事中發生嘅情況可能有更好處理做法。我並無接受過咩帶隊訓練或者會有咩專業知識，我甚至亦都好懷疑坊間有無咁嘅訓練針對帶隊，或者放行社會有？即使係學校教職員負責帶隊，有無培訓去準備教職員去進行呢項工作，如果無，咁出事其實又有幾奇？

我最早嘅帶隊經驗，同射箭無關，大學一畢業就入咗弱智人士體育協會(HKSAM)做，雖然只係做咗一年多，但見識到好多嘢，因為HKSAM係非單項運動總會，加上有好多出隊機會，當中包括我首次參與大型運動會及奧運會，作為運動員去2012倫敦奧運或者教練去2020東京奧運並唔係我最初去奧運，第一次係2007年世界夏季特殊奧林匹克運動會 ，我嘅身份名義上係田徑教練，實際職能就係隨隊職員加田徑隊照顧者。當時帶隊職能自然同後來作為射箭教練帶隊出賽有差別，但最早嘅隨隊經驗就係咁儲番黎。幾年後開始教傷殘射箭，同樣有唔少帶隊機會，單項比賽或者大型運動會都有，加上自己出隊愈多，到後黎帶青少年隊時就已經有一定經歷。其中亦都有啲海外比賽係唔關學校唔關體育總會事，單係私人報名，興幸當時又有家長放心畀啲初中學生跟我去比賽，我最初係以為家長會想跟埋飛，但好多都只係放手畀個青少年自己跟我哋去參賽，對青少年射手黎講應該係一個幾特別印象深刻嘅經驗。

我有幸參與過唔同機構大少唔同比賽，見識過唔同做法，經驗係慢慢儲番黎。最初帶隊時都無人教要做咩，但因為弱智人士體育協會有資深老闆、同事及各運動項目教練，全部都有帶隊經驗，咁就係跟住學。帶弱智運動員自然比帶正常人更多要考慮，雖然出得隊都係自理能力OK而且比較醒目嘅一班，但都會比帶一般運動隊多出現一啲新奇有趣嘅問題。印象非常深刻嘅有幾件事，其中兩件事應該只會發生喺大型運動會裡面。

第一件事係喺機場未真係出發已經發生，航空公司座位畫位方法準則係咩我就唔清楚，但我哋並唔可以畀咩位就坐咩位，因為需要運動員所屬教練或者相熟識職員坐附近，唔只係等佢安心，更加係有實際功能方便照顧，例如派餐去廁所之類可能都有需要幫一幫運動員。咁就大工程了，收到登機証各項目運動員畀畫位打散晒，我哋要即時人手重新編排一次，再改晒啲登機証，之後先分番畀各項運動教練及職員，就係短短收到登機証到入閘之間本身已經混亂嘅情況下去解決呢件事。登機証、個人証件自然唔需要講一定係由各項運動教練及職員收起晒黎保管，好似舊時參加旅行團咁。成功登機都未係休息時間，安頓好運動員之後，除咗得閒帶佢哋去洗身間幫佢哋睇水拉住度廁所門（唔係個個識鎖門），或者管理秩序叫運動員唔好咁噪騷擾其他乘客外，就係時候幫所有人填入境紙，印象中好似係4、5個職員填200人份，咁都搞咗一陣。

第二件我當時唔預計到需要做嘅係查核大會証件，通常大型運動會係預先做好晒証，或者入村時核對資料再印出黎過膠就搞掂，最多都係補影張相。但嗰次唔同，証件做唔切，去到抵埗開始練習臨近比賽時都未搞掂。咁啱做大會証嘅office就喺田徑場附近，而當時我又唔知點解同田徑教練走去咗入個office入面，因為証件啱啱做好，所以我哋兩個人突然間幫手檢查咗全團200人份嘅証件，當中相片、姓名、性別、及職能（影響持証者入得咩場區）等都要檢查，亦都有錯漏。我哋並唔認識所有其他運動項目嘅教練運動員，所以都唔係一睇就知有無錯，而真係要逐個逐個人逐項逐項資料去核對，最後好似歷時差唔多兩個鐘，呢個係毫無先兆突然間增加嘅工作，人都癲。

開頭話能夠出隊嘅運動員自理能力一般都比較好，自理能力係能夠訓練，亦都需要經歷先會有進步，出隊出得多嘅運動員自然都會做得比較好，但如果完全未出過隊又點算？有試過大型運動會之前有搞訓練營，去度假營困住運動員三兩日加埋訓練，除咗畀運動員離開屋企體驗出隊生活學習適應之外，更重要係畀機會我哋職員及教練觀察運動員，睇吓有咩潛在問題。唔一定似有咩安全紀律問題，但都可以睇吓邊個容易帶漏嘢、容易唔知醒唔準時、甚至飲食習慣都可以見到，我記得有一名運動員原來好鍾意飲可樂，當時就嘗試改變佢習慣，叫佢唔好飲汽水，或者運動期間及前後改飲運動飲料。呢啲唔係訓練營真係無機會做，屋企人未必識做未必會做，平時訓練完散水教練又管唔到，去到真係出隊時比賽期間你又未必想改變運動員習慣驚影響運動員。

不過集訓營係好奢侈嘅活動，唔多機會搞到，有時不明所以嘅管理層仲會覺得搞呢類型活動多餘無效益，唔明白要運動員出隊有好成績，唔單只係運動表現好就足夠，團隊管理都好重要，愈多人愈大團就愈高難度。而家遊學團出事嘅情況都唔係喺課程活動參觀期間發生，而係喺其它時間出問題意外，帶隊嘅人有無能力預計及評估到風險，有無意識要處理問題，有無能力管理好團隊係好重要。

青少年運動員自理能力比較參差可以話係合理預期，提醒無限次仍然會有人帶漏嘢，例如無帶運動員証就最常發生，大人都容易唔記得，因為塊牌呢件身外物本身就從來都唔會喺日常生活裡面出現，唔記得佢好正常，最惡劣情況係搭完成個鐘車先知帶漏証，入唔到場打唔到比賽。又試過有運動員上車準備去機場回港時先話唔見咗部電話，最後上返房間搵，竟然係喺廁所洗手盤同牆邊條罅中間搵番，唔係好明點解會放部電話喺嗰度。成年人都會有機會出問題，試過回程搭飛機途中有教練突然醒覺自己將身份証放咗去寄倉行李入邊，嗰次都係我第一次有意識到返港入境係可以用護照過關。多檢查運動員証件、行李可以降低出意外機會，但anything can go wrong must go wrong，出意外先係合理係正常，帶隊時EQ非常重要，發生預期以外事情時即時解決問題，減低對運動員、大隊及其他運動員嘅影響最重要，即時鬧爆個運動員根本無助達到呢個目標，即使好多情況你當刻真係會好興。

除咗必定會檢查証件，帶青少年射箭運動員定必會做嘅就係到埗當晚需要運動員set-up好整套弓箭器材，逐間房去檢查，順便去睇吓間房有幾亂，亦都可能畀少少壓力等隊員唔好咁亂黎，或者運動員有咩問題都可以個別解答一吓、有咩比賽前緊張又可以傾幾句輔導一吓，通常一大堆人就唔會講，單對單先會敢提出。如果團隊大運動員人數多，咁就已經足夠玩成晚。帶漏器材預先發現可以多啲時間去搵後備或者補救，另外人硬係好鍾意趕死線，唔去到最後一刻唔做，特別係青少年習慣趕功課，好多時唔到最後都唔會痴箭毛、箭唔會寫名，先一夜檢查發現總好過到比賽前器材檢查先畀裁判發現。而器材經過飛機運送亦有機會出事，例如複合弓放箭器個感覺可能會有差別，拎出黎玩吓feel吓好過去到比賽場練習時先發現有問題。即使包裝得幾好，意外永遠難以杜絕，聽過有運動員將複合弓用啪啪紙包得非常妥當先入箱寄運，不過去到目的地拆裝剪開啪啪紙時錯手將drop rest條cable一齊剪斷埋。

青少年較少機會、甚至從未試過唔跟屋企人飛去外國，跟年齡相近隊友同房自然興奮容易玩得癲又或者相反多磨擦，影響唔大通常都唔理得咁多，不過玩得癲我就試過有一次喺酒店房外走廊拍門無人應，因為幾個運動員放房內唱K自high，結果我拍咗超過10公鐘門佢哋先聽到開門，我就喺走廊聽歌聽咗10幾分鐘，唔知佢哋隔離房聽咗個演唱會幾耐。好彩當時無聽見有人投訴，或者唔似而家咁興拍片出post放上網批鬥，否則係有機會小事變大事。

好多問題唔只係青少年專利，其實都有機會發生喺成人身上，只係機會比較微。試過大型運動會出隊有一位其它運動項目嘅男性教練失蹤，電話無人聽，拍房門都無人應，以為佢有咩事，咁女性職員已經拎埋後備門匙想入房睇，當時我身份係射箭教練，只係咁啱路過，女性職員就捉埋我一齊入男房，最後發現上年紀嘅男性教練安好無事，只係佢習慣戴住耳塞訓覺，畀我哋叫醒當然就嚇咗一嚇。禁止青少年進入異性房間係基本，但成人進入異性房間更加需要保障自己，捉個人證一齊係有需要，唔知而家嘅帶隊領隊教練有無意識到呢個問題，有咁認真對待呢啲情況？

唔畀入異性房間，有咩問題唯有門口或者走廳解決，呢個故事又番返去帶弱智人士大型運動會，有一次凌晨三點有人拍門（心裡面開始講緊粗口），一開門見到一名女運動員企喺門口度喊緊（粗口加倍），食番堆粗口落肚，用好善良嘅聲線問佢做咩事安撫佢，運動員解釋行雷佢驚，噪醒咗嚇親（粗口萬倍），咁喺門口擾攘一輪等佢心情平復番少少之後我就帶佢番房，呢個時候我就突然醒起，個運動員同房咪係佢教練囉，做咩佢要出房行成條走廊去拍我門求助，而唔叫醒佢隔離床個教練？！（粗口無限），而最後佢開房門入房時我就見到教練仍然熟睡中，可能直至今日教練都唔知有呢件事發生過，運動員當晚有隔開過房間......

帶青少年隊慣常會設門禁時間，例如10點後需要返自己房。即使大人隊唔會咁嚴格，都可能有類似規律需要守，例如大型運動會一般都要向團隊申請先可以出村，或者有時限需要番村，當然有幾嚴格就好睇情況，完成所有賽事一般都唔會反對外出，但例如武肺時東京奧運期間，理論上村內參加者除咗比賽外係唔畀外出嘅。講番青少年隊，門禁時間到就會查房，之後簡單做法可以喺房門外貼條膠紙作封條用，咁如果房內運動員偷走出房就無辨法貼番條膠紙。但教練又要再多做一樣嘢，第二朝要早過晒所有運動員，於早餐出房時段前洗樓檢查一次，睇吓每間房門口膠紙是否健在。而我最憎係啲新酒店為咗privacy，搭𨋢要拍卡先撳到樓層，咁工作就變得非常麻煩，通常都係行後樓梯算數，門禁洗樓或者上面講到埗set-up器材檢查就要不停行上行落走黎走去。

設門禁係想運動員作息定時，同時減低佢哋過房玩、自己走黎走去甚至私自偷走離開酒店住宿地點嘅機會，但留喺房內都唔一定相安無事，試過有運動員因為房內廁所門鎖有問題，被反鎖喺廁所入面，不幸佢又無帶電話入廁所，而佢個同房竟然喺佢叫晒救命時都聽唔到繼續訓，最後好彩酒店比較舊式，廁所裡面竟然有電話接駁去酒店大堂接待處，最後酒店職員要爆爛廁所門塊玻璃，運動員先可以逃出廁所，之後當然就要換房間。

有時我都幾鍾意啲比較舊、比較hea嘅地方同住宿，另一個經歷唔係帶隊而係作為運動員參賽，隊友去到比賽場先知漏咗証件喺房，雖然比賽場喺宿舍附近，但其實都要行10幾廿分鐘，去過幾個大陸啲訓練基地都係咁上吓，來回就要超過半粒鐘，根本無可能自己走返房拎。當時我同另一位隊員無賽程留喺宿舍，原本都係諗住去比賽場睇比賽但未出發，咁我哋就求其叫個執房姐姐開嗰間唔屬於我哋房嘅房門，畀我哋入去偷嘢，之後再行去比賽場個圍柵外面攝張証畀隊友，行去圍柵只係10分鐘內距離，不過就係無入口入場。你估如果住間高級5星酒店，有無可能畀我哋指吓個鼻話要入房就有人開門？如果咁唔好彩嗰次係住高級酒店，就有機會趕唔切拎証件，咁就可能報唔切到，最差情況就係無得打比賽。

Common sense is not common，好多更明顯有問題、大眾唔能夠接受嘅事都唔係必然，唔一定係所有人嘅norm，唔可以假設所有人都係咁諗。所以寫清楚好緊要，就算無培訓畀帶隊領隊教練，起碼有基本指引共識可以跟從執行。例如整個比賽完成之後，好多時賽會都會搞個晚宴，如果係青少年運動員出隊成人隊比賽，晚宴有酒精飲料你畀唔畀青少年隊員飲？當地合法飲酒年齡係幾多歲，會唔會同香港有分別？如果係青少年比賽全隊都係青少年又畀唔畀飲？其實射箭本身係完全禁止酒精運動，我認為由機場集隊到回港入境解散前全程都需要一刀切唔畀飲酒，包括成年隊員於飛機上都唔可以飲。至於喺房間裡面著唔著衫嗰啲，我諗應該好多人都同我一樣唔覺得可能接受同性就可以隨便裸露，但個現實係呢個世界很大，又真係有人唔覺得有問題，所以先會做得出呢啲事，進而先會出問題有投訴。

呢篇講嘅全部真人真事，可能引起故事中主角老尷，有啲故事有番咁上吓歷史，當中青少年主角早已經成年並且做埋教練。雖然上述經歷可能係萬中無一、五百年難得一遇，而事件中嘅處理方法亦都唔一定係最完美，但呢啲經驗、知識本身好難轉承，有白紙黑字訂明指引規矩可以跟從會有幫助，即使指引唔完善都可以慢慢修訂。另一樣好有用嘅係賽後教練領隊報告，寫報告我就寫唔少，但睇就無乜睇過，咁寫報告交報告就變成走程序，報告要畀領隊教練參考，咁先有助將來帶隊領隊教練準備得更充足，減低發生意外機會並做得更好。

小朋友齊打交，部份所謂欺凌，其實並唔新奇，按程度亦都唔一定係咩超級大件事，有時大件事只係報導小事化大，網上帶風批鬥，希望所有運動或非運動團隊都無穿無爛出入平安。

淘汰賽分紙、織弦班筆記、器材年份（WIAWIS、Hoyt）、產品目錄（Hoyt遠至1951年、WIAWIS、MK Archery）、Tinkercad 3D反曲弓

淘汰賽分紙

反曲弓個人淘汰賽分紙

複合弓個人淘汰賽分紙

反曲弓隊制淘汰賽分紙

複合弓隊制淘汰賽分紙

反曲弓混合隊制淘汰賽分紙

複合弓混合隊制淘汰賽分紙

試算表原檔，按自己需要修改

織弦班筆記

Read more

年齡

喺睇分數之前，先黎啲比較簡單嘅數字。男子運動員平均年齡係25.78歲，最年輕16歲，最大42歲。女子運動員後生少少，平均年齡24.06歲，最年輕16歲，最大41歲。

箭數

自己做運動員時，成日有一個雜念，用咁多時間練習，仲要畀咁多錢去比賽，唔想一場就byebye，形成一個壓力來源。呢個係嚴重唔對等嘅，我相信發展愈完善嘅地區，運動員呢一個壓力來源應該愈低，因為做運動員相對穩定，放棄、付出嘅嘢無咁多，而且唔會覺得每一次都可能係最後一次比賽，之後就要面對現實去讀書、番工。

咁喺奧運會入面，由64強淘汰賽打起，最多可以射到幾多箭？淘汰賽射得最多箭嘅男運動員，總共打咗26局加上一次加射共79箭，而女子運動員射箭最多一位射咗81箭，27局無加射。不幸地兩位箭射得最多嘅運動員都係第四名，並非個人獎賽牌得主。

加射

每屆整體都算幾好天又無乜風，比賽都幾高質分數都幾高。先黎睇吓shoot-off加射。男子個人淘汰賽共有7場需要加射，射到10唔一完贏，但射唔到10就一定輸，好癡線。

女子個人淘汰賽共有10場需要加射，分數亦都好高，要打到黃先有機會贏。

局分

局分比較難入手分析，唔知點睇先科學。先睇吓打到啲咩分：

男子分數明顯比女子高，一局30環出現次數係女子3倍有多，而一局29環出現次數亦都比女子多60%。呢個似所有淘汰賽由64強到獎牌賽嘅每局箭總分出現次數，比賽愈接近獎牌賽，理應每局箭總會愈高：

奧運賽程係一日連打兩輪，同時為咗圖表更易睇，所以將每兩輪比賽夾埋黎睇。呢度都明顯見到愈接近獎牌賽分數愈高，男女子一樣，合符預期。留意呢度係按每局箭總分出現率比較而非次數，因為每輪比賽場數不同，唔可能用實數比較。

如果拆番開每輪比賽睇又會係點？幾多分一首先有得贏？下面一堆圖表就可以睇到：

只係上一輪去到32強，打滿分已經唔係贏硬。

一局三箭打27環已無得贏，而且已經無人打24環。

咁睇男子都真係好高分，如果金無10得27環，拎到局分嘅機會連一半都無。

跟住女子：

第一輪打24環都仲有一丁點機會拎到局分，只限女子。

全金已經係基本。

8強以後無人再打24環，打唔到27環或以上亦都必輸。

如果唔考慮一路晉級對手愈強分數愈高，全部一齊計算就會係咁：

一局三箭27環，都係基本入場門檻。

以弱勝強

其實以弱勝強唔係太準確，有啲對賽選手排名差距唔遠，又或者有時只係排位賽失準打得唔好，排名較低選手實力可能一啲都唔弱。有啲場次淘汰賽有高達50%對賽由低排位運動員勝出，而整體所有淘汰賽，低排名女子運動員於淘汰賽中勝出嘅機會較男子大。

淘汰賽vs排位賽

排位賽失準只係我斷估，真實運動員係唔係淘汰賽打得好過排位，我嘗試用箭平均分去睇。

似乎男子就一半半，但女子運動員就比較多喺淘汰賽打得低分過排位。當然呢個亦都受好多環境影響，唔單只係運動員發揮或者緊張受壓影響。

寫公式用咗我好耐，不過而家只要入簡單數據，包括比賽排位兩輪環數，淘汰賽每一局箭環數及勝負和，及加射箭環數勝負等，所有計算及圖表都會自動生成，唔需要再手動計任何數。呢啲數據分析除咗滿足到好奇心，亦有實際應用價值，例如可以更清楚知道要咩水平打幾分去到比賽先有得打，令期望及目標目標更合理，亦都可以通過分析同一個比賽往績，去考慮值唔值得去參加該場比賽，估計有無機會打到需要成績。個試算表再整理吓先諗吓放唔放出黎……

下面主要係記錄我留意到觀察到嘅嘢同疑問，特別係同認知上有差別動作或者器材，分析有但唔想加太多。一黎就咁睇幾箭或者睇張相唔可能理解到射手做某一件事背後嘅原因，二黎係射手嘅做法好多時只係取捨下嘅選擇，兩害取其輕，我哋唔可以假設所有嘢都係標準、完美、或者所有人都適用。咁所以分析未必好有意義，更加應該避免盲目抄襲人哋嘅器材或者動作技術，尤其係啲比較特別、唔常見嘅嘢。

呢篇內容係教學用、技術比較分析、學術分享，如果侵犯版權需要刪圖請話我知，希望唔好要成篇落架。

器材

竟然見到有射手用sight clicker，而且唔係因為話要塊響片垂直精準啲，而真係因為箭人好長。一般箭裁咩長度唔單只係因為要用響片，更加唔係隨個人喜好，而係想要令到箭側墊推箭桿一個特定位置。未知有咩特殊原因令到呢位射手要用咁長箭？

除咗sight clicker，呢位奧運時世界排名第一嘅美國射手Casey Kaufhold弓上面仲有另一件器材吸引我注意，就係個瞄準鏡。瞄準鏡個樣唔常見有啲特別，但又好似熟口熟面，原來係近期一個學生有用過嘅款式Wilfer Air Recurve Aperture。

借學生隻鏡認真望吓，咁睇就我認真無興趣，第一佢外殼係全膠好易爆，我學生隻鏡就已經爆咗；第二佢前後都有鏡，雖然話係玻璃鏡片，但望過一兩眼我覺得都幾唔清晰，比較其他鏡差，兩塊鏡就望出去影像就更差，唔理解要前後鏡嘅原因；第三佢賣成80USD少貴，我會揀畀多少少錢買隻金屬殼、鏡係用名牌玻璃嘅款式。

於排位賽刷新世界記錄嘅運動員Lim Sihyeon隻護指係六神合體，AAE Elite身、Fivics Saker I / II姆指托，再加上Wiawis指隔。就相片睇，個指隔斜向上而唔係一般咁垂直護指金屬版，可能係按個人需要再改做？其餘兩位韓國女射手嘅護指相對就無咁魔改，都係整厚個指隔或者尾指鉤咁。

另一個特別位係無名指周圍嘅護指皮並無按手型修剪，正常皮唔會留咁長，因為撒放時會幹擾弓弦。但更奇怪係並非每個韓國射手都一樣做法，唔清楚有咩考慮去按個人需要調整，但亦有可能係根本全部都無修剪過。

Kim Woojin、Kim Je Deok同Nam Suhyeon三位射手護指塊皮超窄無突出無名手指，可能係剪到超貼又或者本身就係好細塊而又無剪過。但Lee Wooseok、Lim Sihyeon同Jeon Hunyoung三位射手嘅護指皮就超長突出無名指好多，唔似剪過咁。要剪到兩塊皮完全一樣好準確應該無難度，唔覺得韓國隊會唔剪塊皮隨便用，又或者韓國隊認為呢個唔係問題無需要考慮？

https://www.facebook.com/WorldArchery/posts/pfbid02TRWuQzPMuWmnPXuogHNQ7nQtRjy6cRhxPoJWwoQcmanUEkfvCE58cohwqDEnG8Kul

好少會影到鞋，一般講法要平底有少少鞋踭，避免跑鞋之類鞋底弧形、鞋頭炒起嘅鞋。就貼文見到跑鞋非跑鞋都有，但竟然有幾對AF、 Air Max，我都幾sure我一定會企唔穩而且腳痛，鞋嘅選擇真係好個人。

左邊第一張圖係未開始比賽練習日時出現，開頭以為呢位台灣射手Tang Chih-Chun用全新弦喺度纖搭箭點，但原來高度又唔啱，最後見到IC tape係用黎整noser靠弦對位。未試過用IC tape整noser或者唇扭，覺得用膠紙整會唔夠穩陣容易走位又或者太細粒感覺唔到，但見呢位射手用得又好似用得無問題。

Nam Suhyeon條弦甩色甩到傻，仲要戴白色護胸。明明Jeon Hunyoung條螢光粉紅弦先應該係甩色甩得最勁，唔明點解粉紅無事但條紅色反而好係流血咁。可能係用緊全新弦打？其他韓國射手係用黑色弦，所以無問題。通常弦甩色咁嚴重都係因為有太多弦蠟，如果卷弦本身有過量弦蠟，織出黎嘅弦會好重，亦都好難整到一致，織弦過程通常會整走啲弦蠟，或者最簡單方法係避免使用呢啲顏色物料去做弦，減低唔一致嘅風險。除咗啲蠟係問題，全新弦未穩定都會增加不穩定性，唔覺得會喺重要比賽見到呢個情況。定係呢啲其實唔係問題，韓國隊唔會考慮呢啲？

手繩弓繩必需要剪，留番條尾揈黎揈去萬一喺最重要時刻鉤到支箭或者干擾到自己專注力就GG。

最後都要提一提品牌，主要自然繼續係Hoyt同Win&Win，但MK都唔少，而Fivics明顯多咗射手用，而我見唔到任何一位射手用世界排名冠名贊助嘅Salinda，當然我估都無人會預計見到呢個牌子。

https://archeryez.com/Gear

台灣網站有人整個表，無研究過有幾準確，自己考慮信唔信。外國就未見到有人整清單，如果見到請PM話我知。

技術

於個人淘汰賽時，英國射手Penny Healey每箭都係10秒先舉弓，差唔多零秒先出手，唔知咩原因而令佢需要壓迫自己射嘅時間。但成件事都好危險，一黎上一篇提到個法文評述員喺唔適當時間開咪，嚴重影響射手，我見到兩次都係Penny拉開未夠鐘個評述就亂開聲講嘢，但作為射身喺場上根本無嘢可以做。二黎觀眾其實唔係好清楚個比賽計時，對手射完一箭歡呼鼓掌，其實另一方個計時器已經開始例數緊，呢個就未必所以觀眾都有留意。而因為Penny Healey未舉弓，啲觀眾係唔識停繼續以為無需要收聲，最後射手應有嘅20秒得番10秒清靜可以專心去射。

原來好多射手隻無名指超短，短到扣唔到弦，如果強行要無名指扣實，可能會令打弓手肘過低對唔上拉力直線。

動作完全唔韓嘅韓國射手，都幾完整嘅Angular Draw，韓國射手用Angular Draw我覺得比較少見，而女射手用Angular Draw就更加少見。比較清晰睇到嘅特徵係舉弓將手前伸去扣弦，近乎完全唔拉弦，手肘一直垂低，拉力由始至終由背帶動，直到拉弦到位再轉移力量時才將手肘上提到拉力直線上。搵番佢啲舊片睇，原來佢細細個射箭已經係用呢套動作。

動作少少韓嘅韓國射手，有唔少位都有韓國射手特色，但有啲位又好個人化。

開滿弓支撐動作同大部份韓國射手都相近，不過估計因為骨架問題，取捨下為確保用力方向合理，無刻意堅持撒放後兩邊手臂高度及方向，持弓臂向下走，拉弓臂亦都係向下走，同時手過晒耳仔差唔多去到肩膀。

雖然兩邊手嘅撒放同大部份韓國女射手唔係好相似，但相同嘅係軀幹好穩定、視覺專注力集中目標、力量完全做到出黎同時動作受控，而中央平衡桿亦都係轉到傻咗，弓向前跳之後手腕撳到支棍尖轉到差唔多過埋頭頂。

動作好韓嘅韓國射手，截圖截埋拉弓會好啲不過無畀錢archery+搵唔到片，完。

三位射手動作。

無論你技術幾好，都總有射得唔好要救箭嘅時候，射箭係計靶上分數唔係選美，動作靚射得準固然係最好，但動作靚射唔中就無用。不過今屆好似唔算多揈弓相。

電視

上次提到一啲直播時畫面上嘅資訊，有朋友話我知韓國電視台直播有其他資訊，下圖左下角有講射手打唔同環數嘅機率。

呢個應該係韓國電視台自己加嘅，雖然我唔能夠肯定呢個數字機率統計上有無意義，就運動員角度起碼我會相信每一箭都係獨立嘅，都有機會打中或者打唔中，即係好似500年一遇暴雨咁。但作為觀眾呢個打10打9機率就好吸引，喺關鍵時刻好容易聯想到會唔會打失有幾難贏，定係打得比平均準逆轉反勝。

韓國台聽唔明我無睇，不過我有睇英文台直播同臺灣電視台直播。亦都聽聞香港有電視台請專業教練上去做評述，不過撞唔啱時間所以無睇到。有專業人仕講就更係正，睇電視最怕就係荷蘭叻之流出現，「只要見阿叻有份出現，你就知道，這個節目必會變為業餘、不認真，和像馬戲團 」。如果你無聽過呢個講法証明你都幾後生。不幸地我睇嘅英文台就出現呢個情況，睇咗陣真係頂唔順，都係睇臺灣台，除非臺灣台無直播，我都唔會轉返去睇英文台。雖然睇英文台嘅時間好短，可能只係睇咗幾場個人淘汰賽，不過已經有唔少金句令我印象深刻：

“compound effect. Small things build up to big”

唔係話錯，但又好難話佢啱。我就未聽過中文有相類似講法，所有嘢都係咁㗎啦關複合弓咩事？家陣係唔係歧視反曲弓？

（按：sorry英文差完全錯晒，有教練糾正呢個compound effect同複合弓完全無關，係類似積少成多嘅意思？）

“two 10s are better than two 9s”

你唔講我又真係唔知喎多謝晒。有句嘢叫唔出聲無人話你啞，我估英文可能唔興呢個講法？

“she misses! （箭係射中9環。靜過太空，當時有其他評述員在場但應該o晒嘴接唔到，跟住話人miss個評述自己再補多句）... she missed the 10”

?????? 評述員可以做少少功課先講嘢 ??????

“all teams on target no.1 (today) wins except Germany”

左手嘅人未輸過；戴眼鏡嘅人一定打8環；非洲每60秒就過咗一分鐘.......關系呢？

並唔係話要好專業講好多技術，因為太技術性未必照顧到無玩開呢個運動嘅人，一般人觀賞射箭好難睇到啲好微細嘅分別。觀眾程度唔同，可能有人比較喜歡上述評述員講嘅內容，覺得比較有趣，但我真係聽到想𠝹凳。台灣評述比較多講動作技術少少，但其實內容講得好精準，同見到嘅動作細微變化運動員表現好配合。

而另一樣我比較鍾意臺灣電視台做法係，佢即時用文字顯示咩台即將有自己代表隊運動員比賽，邊個台會進行直播，好方便觀眾，即使無留心主持講緊咩都怕會miss。

講畫面就一定要提開幕入面一條間場影片，Minions近排除咗教牌皇讀對白，仲拍咗呢條奧運開幕片。

影片係Minions喺架潛艇入面玩奧運項目，後尾打爆咗啲窗潛艇入水，最後浮番上塞納河水面。並唔係所有運動項目都有出現喺潛艇內，我見到嘅包括，體操（競技、藝術、彈床）、運動攀登、跆拳道、摔跤 、柔道、舉重、拳擊、射箭、田徑（撐杆跳、跨欄、鉛球、標槍）、排球、游泳、單車，而大部份項目都只係得幾秒甚至得個wide shot。

而最驚喜嘅係，喺總長度2分9秒嘅影片入面，射箭佔咗成14秒，應該係整條片入面佔最長時間嘅運動項目，仲要同蒙娜麗莎畫作同場，蒙娜麗莎畫作係其中一件串連整個開幕禮嘅道具。

場地

要電視見到畫面靚，場地佈置同拍攝包括影頭擺位都好重要。射箭同今屆其它所有運動項目一樣，要統一貫徹個色調，好多設置同運動器材都改用個主調嘅紫色同紛紅色，射箭靶上號碼牌同風旗就用咗紛紅同白色。

其它運動唔識，但射箭風旗我就幾肯定無見過呢隻紛紅色。第一樣諗到嘅係有無改賽例特別去遷就奧運，翻查賽例原來WA係咁寫：

7.2.6.7. Outdoors wind flags, of any light material and easily visible colour (such as yellow) to serve as wind indicators...

咁其實係無特別限制顏色嘅，只要容易見到就得，再睇番之前奧運，2020東京風旗係藍色同白色、2016里約風旗係紅色同黃色、 2012倫敦風旗係綠色同白色，所以屆屆都唔同顏色。好彩佢無將靶面都改做今次奧運主色調，但作為觀眾我又覺得改個靶做奧運配色可能會幾好睇。

除咗因為顏色令到件事好睇，其實今屆各場地都多咗啲鏡頭，射箭唔明顯，但其它場館總會有一兩部攝影機飛黎飛去，室內室外場都一樣，室內場可以係場內四隻角各有一條鋼索拉住同一部攝影機，令到攝影機可以成個場飛，室外場就可能係一條超長鋼索打斜跨越整個場地畀個攝影機走。

射箭直播見到低炒影個靶可能都係新？我就無乜印像之前有見從過呢個角度影裁判判箭。而決賽場橫跨發射線弧形路軌畀部攝影機圍位射手轉、場中間兩個地堡畀傳媒匿入去影相，同埋攝影機吊臂就係基本，之前奧運都有。但都仲有一個位我覺得需要改善，場地主攝影機吊臂只有一隻影住右手射手大頭，左手運動員成日都係得個背脊上鏡。

新聞

今屆射箭比賽都有唔少新聞同經典畫面，印象最深應該係男子個人金牌賽最後shoot-off。Kim Woojin對Brady Ellison已經正，兩位同期頂尖射手比咗14年，但兩人都未曾拎過奧運個人金牌。比賽打到shoot-off，兩人都係10，只係度距離差5mm，呢5mm就決定咗今次嘅金定銀。

Ellison v Kim tiebreak animation：

https://fb.watch/tY7ES-YNxG/

仲有無下次機會？無人知，不過Brady於賽後受訪問時話希望4年後下屆LA奧運再打過，兩位射手都唔後生，Kim Woojin 32歲Brady Ellison 35歲，如果四年後兩位射手都繼續打緊，仲可以打到去奧運，再次於金牌賽對上，應該會係非常振撼嘅一場對賽。

https://www.worldarchery.sport/news/201766/brady-vs-woojin-greatest-final-ever

訪問中另一樣嘢吸引我注意係，如果記者無聽錯數字無手誤打錯，成件事都幾癲，報導話Brady三個星期前先改拉距，箭長加長咗1 3/8吋。而改咗之後即刻打得好咗，仲話係好耐無打過咁好嘅分數。當然1 3/8吋只係箭長，拉距加咗幾多無講。但睇番影片我就唔係好諗得明原本係點射，就咁睇個動作好正常拉距好合理，感覺唔似係突然拉長咗好多。

另一場好緊張嘅賽事係女子銅牌賽，由主場法國Lisa Barbelin對韓國Jeon Hunyoung，呢場我係喺現場睇，緊張程度比金牌賽更高、氣氛更好。唔單只係射箭項目，其它比賽都一樣只要有主場法國隊運動員參賽，氣氛都好高漲，主隊觀眾係多數，瘋狂打氣支持叫Allez Les Bleus，意思係Go! The Blues (法國隊通常藍色衫)。奧運記念品都有啲係印咗呢句加油打氣字句。正常射箭賽韓國支持者都唔弱，但場內人數都係法國多啲，而且今屆應該禁止觀眾帶大型物件入場，舊時見到啲打鑼打鼓今屆就無辦法做，所以兩邊支持者聲勢都差唔遠，甚至我會覺得法國勁啲。

Lisa Barbelin為法國贏得歷史上第一面奧運射箭女子個人獎牌，仲要係從韓國運動員手上贏得獎牌，低排名(30)贏高排名(13)以弱贏強，成個故仔好完美。Lisa排位賽652環唔算高分，比年度最佳四月尾世界杯第一站678環有一段距離，今年其他成績包括五月頭歐洲錦標賽660環，五月尾世界杯第二站659環，同六月中世界杯第三站664環。

排位賽排30名箭平均分9.06環其實好難打，除咗第一場淘汰賽係對低排名對手，之後每一場都係對高排名，先贏三場、之後準決賽負、最後奪得銅牌，合共四場以低排名贏高排名對手。最後包括金牌賽所有淘汰賽箭平均分係9.16環，比排位時高分，但同Jeon Hunyoung比都仲有少少距離，Jeon Hunyoung所有淘汰賽箭平均分係9.25環，而即使只計銅牌賽5局15箭總環數都係Jeon Hunyoung比較高分，138環比Lisa 137環微微高一環。雖然今屆三位韓國女射手表現都唔算好穩定，但點計都係Jeon Hunyoung高分少少，不過比賽就係咁，局勝制下最終由Lisa Barbelin主場勝利。

https://www.worldarchery.sport/news/201765/lisa-barbelin-makes-history-womens-individual-bronze

第三件我覺得幾特別嘅新聞係有一位參賽者Yaylagul Ramazanova係懷孕六個月嘅準媽媽。賽後受訪時呢位射手話shot off出手射支10勝出比賽前畀BB踏咗腳，覺得係好運嘅徵兆。

https://www.dailymail.co.uk/sport/olympics/article-13718719/pregnant-azerbaijan-archer-yaylagul-ramazanova-olympics-win-baby-sign.html

單新聞係juicy，但我不禁比較負面地去諗，如果嗰支箭場比賽係輸咗，唔知會唔會都入個B數？不過能夠懷孕六個月打奧運都已經係好犀利，而且感覺上射箭點都比另一位奧運選手懷孕七個月參加劍擊黎得安全。

最後一則射箭相關新聞就無咁正面，係話有觀眾干擾比賽，又噪又電話響咁，而呢堆觀眾竟然係韓國廢老，令到其他韓國人感到非常丟架。

https://www.ettoday.net/news/20240807/2792819.htm

韓國人竟然唔清楚、唔理觀賞射箭比賽禮儀，確實係比較難以置信，但更難以置信係比賽場現場嘅法文評述員，我睇女子個人獎牌賽事短短兩個幾鐘裡面，佢竟然有兩次喺時間未夠仲剩番一兩秒，倒數計時器未響，射手箭未離手時突然出聲講嘢，嚴重影響射手及比賽。呢種嚴重犯錯一次都嫌多，但竟然無裁判或者賽會負責人警告佢阻止佢，畀佢再一次開咪干擾比賽，絕對係不能接受。

文太長，之後一篇會講吓器材同技術，就咁睇比賽唔太能夠評論原因好壞，但可以分享一啲我觀察到嘅嘢。

比賽前除咗介紹運動員同裁判之外，今次第一次加入有介紹教練，番睇上屆東京奧運影片確實未有咁做，係呢一屆新增。呢個係對教練專重，一定係好事。不過印象中舊時有部份隊伍或者運動員太有性格，唔鍾意畀人指指點點，但礙於規例必需有人企教練席，可能只係搵個隔離隊教練甚至醫護等隨隊工作人員站台，咁就會變得好搞笑。

比賽時如果要shoot-off，除咗顯示箭得分，仲顯示埋箭離靶心幾遠。呢個唔知做得有幾準確，暫時未見到兩支超接近嘅shoot-off箭，無得比較。

奧運官網成績更新得非常快而且比以往詳盡，雖然介面上有啲問題，有時錯格式或者load唔到之類。

https://olympics.com/en/paris-2024/schedule

同上屆唔同嘅係，奧運網站內成績版面即時自動更新比賽中嘅成績，更加係用正方三角圓圈分別標示隊制比賽幾位射手射嘅射序及分數。

另外亦都有靶面式樣嘗試標示箭喺靶上落點，但呢個就有少少fail，由於標示太細，網頁版近乎睇唔到，電話版我就完全睇唔到。

不過呢個係一個好嘅新做法，觀眾可以更清晰成位事，甚至乎教練要搵番資料做分析都比較容易，希望以後會有繼續咁做。就咁睇每一場次成績分數係幾好睇，但要睇整個比賽就唔同，佢唔似Ianseo咁有對賽表，玩開射箭嘅人熟知淘汰賽制可能會覺得啲比賽成績散修修好難跟。要睇都唔係無，上返World Archery網站就有對賽表睇：

https://www.worldarchery.sport/

不過有幾多人會咁覺得我就唔知啦，因為我英國而家啲屬會裡面嘅會員，即使係有參加metric比賽嘅射手，好多都完全唔識淘汰賽制做乜，既然都無睇過淘汰賽成績表，咁就唔會有睇唔慣版面呢個問題。

有啲資訊增加係好，但一啲我覺得無乜用嘅資訊就繼續有得留低，觀眾可能覺得幾有趣，但我以教練角度就覺得無乜用，甚至係多餘，太多資訊會搞到睇比賽嘅人更混亂。呢啲資訊包括運動員即時心率同埋風向風速。

風向風速唔係無用，但只要睇風旗，運動員有無被風吹郁，頭髮衫袖有無揈嚟揈去，有無hold好耐弓，或者箭飛行之類已經可以知道有無風影響。反而個風向風速計放嘅點，即使有風，都未必對運動員或者箭有影響。而心率就比較奇怪，轉播時並唔會有每一位運動員嘅心率，唔知係唔係運動員自己選擇戴唔戴感應器，又或者新技術已經唔需要戴感應器都可以量度到心率，下面亦都會有講到呢一點。如果感應器本身唔太準確，咁睇黎都無謂，加上七孔流血還七孔流血死還死，射得準唔準原因太多，心率高低只係其中一樣，畀觀眾睇埋心率可能只係多餘資訊，唔一定反映到比賽進程。

作為神級隊伍，圍繞韓國隊嘅新聞永遠都係最有趣。今屆最搶眼應該係韓國隊用機械射箭黎練習比賽，唔少人應該係睇到呢條Youtube片得知呢件事：

而令到成個計劃成事嘅係大企業Hyundai參與，唔單只係射箭機械人self-adjusting shooting robot ，仲有其它科技，例如多攝錄機錄像分析運動員動作，3D打印握把，及影像心率感應器等：

https://www.hyundaimotorgroup.com/news/CONT0000000000157798

上文亦都提到Hyundai有一個短期展覽The path of an archer，展期非常短由7月26日至8月16日，如果呢段時間去開韓國都幾值得去參觀，不過我就搵唔到詳細資料。

射箭機成件事好搶fo，潛台詞好似係已經無人夠我哋打，要挑戰機器。

但原來一search呢個都已經唔係新聞，三年前已經有過相關報導。

而呢個做法，更加唔係3年前先出現，有見到台灣業內人仕見到報導後有感而發，其實早於2016年台灣都有諗過使用類似射箭機訓練，奈何資源所限最後未能成事。而再搜尋落去，會發現韓國射箭機械人亦都係遠在2016年以前已經存在而且被應用，不過可能因為技術所限，當時主要係用黎協助揀箭，未有提及有用黎同運動員做對賽訓練：

https://www.hyundaimotorgroup.com/story/CONT0000000000003001

我哋自然無辦法知道呢個概念係邊個先發明，但係最重要嘅係，運動訓練最需要嘅係配套，已單係就咁政府、訓練機構甚至大學未必有足夠能力去挑戰更快更高更強，而係需要更大型嘅支援，例如大企業嘅參與。主流傳媒同政府仲係關心緊講緊獎金，十年如一日毫無進步，真係非常落後。無付出就就唔會有成果，講嘅係政府同埋體育運動管理層。

除咗射箭機械人出現羅生門唔知邊個先後，仲有其它科技都係唔同地方各自開始研發，上面有提過用影像黎做嘅心率監測原來都係喺唔同地方有各自發展。韓國Hyundai版本自然係用黎做訓練，喺上文內睇到喺2021年或以前就已經開始做緊，用普通鏡頭影住運動員就可以測到心率，運動員無需要穿戴感應器，確保運動員可以不受幹擾。如果使用普通webcam去做，鏡頭可設於距離運動員3米外，又或者用可以zoom嘅鏡頭放喺運動員100米外都得。

我讀運動科學時嘅認知係啲手錶、腳帶之類係唔能夠好準確測心率，要準就必需要戴心率喺胸口，不過呢個都已經係老人家差唔多廿年前嘅觀念。咩感應器都唔需要穿戴只靠影像去監測，唔知呢個技術有幾準呢？走去搜尋吓論文，原來呢個都已經唔係咩新技術，遠喺大概2012時已經有論文講呢個技術準唔準。呢種技術係分析運動員膚色變化，聽落好神化，但呢個就係一個準確嘅即時監測心率嘅方法。

World Archery或者奧運用版本用途自然係畀觀眾睇運動員有幾緊張而唔關訓練事，最早期測試過用穿戴於腳上嘅感應器去測心率，運動員反應當然唔like。網上搵到係呢個記錄，當時係2012年，只係有喺World Cup比賽入面試行過，未有出現喺奧運比賽：

https://www.worldarchery.sport/news/93733/revealing-secrets-archers-body-world-see

影像版係2021年東京奧運第一次應用於比賽上，跟據文章所講，同韓國版有少少分別，除咗監測運動員面色變化，仲話會監測面形變化（表情？）

https://www.worldarchery.sport/news/200395/archery-debuts-heart-rate-graphics-broadcast-olympic-games

比較奇怪係出文時今屆奧運射箭賽程大概過咗一半，見到有顯示運動員心率可遇不可求，只係時有時無，幾場賽事都出唔到一次。

比賽仲有一半，睇吓有無啲器材、動作技術比較特別，之後再講。

建議系列

1. Inside Out

   調返轉黃色係1分兩分，白色係9分、10分，不過miss依然係miss。

   你會唔會為咗打10分而去冒射失嘅風險？

   

   呢個遊戲係一個非常好嘅練習，因為會增加射手壓力， 同時亦都係一個非常好嘅偏瞄(aim-off)練習。如果未做過偏瞄練習，射手可能會發現其實要唔瞄圓心或者黃，其實係一非常困難嘅任事。重點係要於整過執行過程由瞄準伸展到撒放完全餘勢動作，都將視線及專注力集中於瞄點上，而唔係一放箭就散咗或者望返去黃心。

2. 收圈

   

   射手有限特定箭數，每首箭決定安全區範圍，如果箭射到安全區外，箭將被沒收，下一首箭射手可以射嘅箭數量就會減少。安全區逐首箭收細範圍， 最後一名仍有箭在手的射手，獲勝，亦可按需要更改獲勝條件，例如餘下最多箭在安全區內的射手得勝，或於箭數相同的情況下，箭最接近黃心的射手勝出。

   變化：組隊進行比賽而非個人，限制每隊箭數而非每個射手可以射嘅箭數。例如四人一隊，每人有兩支箭，比賽開始後，當射手開始射失，箭數量開始減少時，隊內可以自行決定由邊個隊員去負責射餘下嘅箭，但每個隊員可以射嘅箭數唔可以多過比賽開始時第一首嘅數量，喺上述例子中即每人最多只可以射兩箭。呢個做法既可以令所有人參與比賽，但降低技術水平差異嘅影響，令到各隊都有機會爭勝。

   我超鍾意用呢個遊戲，第一呢個遊戲執行非常容易，簡單過任何計分活動；第二呢個遊戲非常適合一大堆人玩，例如pe堂嘅時候，由於每個人都能夠參與，而且等待時間比較短，通常學生都玩得投入，氣氛良好；第三當有隊伍開始被淘汰時，你又可以提早開始執拾器材，收返啲箭、叫佢哋除低護臂之類；第四呢個遊戲有實際功能，如果需要喺pe堂入面挑選學生入隊，通過遊戲可以睇到邊個射得好，同埋去到最後階段依然夠膽企出黎去射箭，喺高壓嘅情況下代表自己隊去爭勝。

3. 挑機（V字）

   

   畫個大V字（或者用膠紙貼出黎），兩名射手對抗，箭最接近尖啄位嘅射手贏。建議按射手技術水平程度高低決定發射次序，技術水平較低者先射，可以射一支或者多過一支箭，之後再由技術水平較高者去防守，後者必需射中較接近V字尖啄位而不出界。

   再懶啲可以反轉張靶紙用張靶紙隻角去玩，不過都係建議畫個V字，因為夾角較窄時壓力會較大，比賽會更緊張。呢個遊戲提供一個機會畀兩名能力差距較大嘅射手比賽，而遊戲對水平較高一方都係一個好練習，因為需要良好抗壓能力。

4. 挑機（靶紙）

   玩法類近挑機 （V字），但使用一般靶紙。 技術水平較低者先射數箭例如6支，技術水平較高者需要射同等箭數，同時每箭都必需要比挑戰者高一環，10環則只需要保持10環。例如：

   先射者：10 9 8 6 4 3

   後射者需要射到：10 10 9 7 5 4

   變化：可按技術水平差異改變要求難度。

5. 秘密任務

   按照正常箭數靶紙計分，但每一首箭外加一個秘密任務，於射完箭未計分前宣報任務內容，如果成功完成秘密任務就可獲得額外獎勵，例如遊戲得分或者獎品。

   變化：呢個遊戲亦都有辦法令到技術水平較低射手有著數，可以同勁啲嘅人鬥。開始射一首箭前，一名（排名低或者技術水平較低）射手負責抽秘密任務。雖然任何射手完成秘密任務都會獲得獎勵，但只有抽籤射手預先知道要做咩，咁就有較大機會完成任務，其他射手就完全係撞彩。

   任務舉例：有M箭；有箭踩界；3支箭分別射到靶上唔同顏色區域；3箭總分低過20；無黃；全紅；3箭同分；3箭分數全部唔係數字（X or M）；3箭總分係質數（2, 3, 5, 7, 11, 13, 17, 19, 23, 29 ）

   呢個game應該唔少人玩過，係喺泰國公主杯比賽會玩嘅遊戲，大會用佢黎送紀念品獎品畀參賽運動員，主持人每首箭都會宣佈任務，射手就要鬥快登好分再衝去主持人度攞獎品。而我試過聖誕前最後一次練習同校隊玩，送禮物畀啲隊員。因為好random大家都有機會攞獎，氣氛都唔錯幾好玩 。

   

唔建議系列

1. 射獎品

   用紙或者廁紙吊住一件獎品，例如零食之類。參與者要射斷條厠紙或者張紙，當射夠一定數量，獎品就會跌落嚟。

   聽落好make sense，但只限用水槍玩時。其實我已經唔記得有無真係見過用弓箭玩呢個遊戲，但應該都幾失敗幾難。最主要係因為好難會射得咁準可以射到密集一條橫線射斷張紙或者廁紙，萬一技術唔好唔小心射中埋件獎品，咁件獎品就直接報消。而個setup上面亦都有啲麻煩，要喺下面擺嘢裝住件獎品。同時獎品要有一定嘅重量，先有機會可以扯斷張紙或者廁紙跌落黎。

   總之成件事好麻煩而且成功嘅機會極低，除非你用打獵刀片箭頭可能就會好啲。呢個好似主題遊樂場嘅攤位遊戲，難度同要喺真正嘅攤位遊戲入面拎獎一樣咁高。

2. 射氣球 / 水球

   呢個好基本無乜嘢值得提，但其實我極之唔鍾意射氣球，所以偏要講一講。一黎因為如果將啲氣球放得太近靶邊，啲人就會亂咁射out晒靶或者擦靶邊，有危險性； 二黎如果係同小朋友玩，射完你要佢地去執手尾清理好個地方非常勞氣，所以我從來都覺得射氣球係搵自己嚟搞。更差嘅變奏版就係射水球，室外都仲好啲，室內仲麻煩，冇咩事都係唔好搞啲咁嘅嘢。同埋其實射氣球並唔係想象中咁容易，除非你整到地球咁大個波，而個遊戲通常都會畀一兩個技術水平比較高嘅射手壟斷咗，極速射爆晒啲波而其他人又射唔到。

   當然細路仔就唔係咁諗，爆波有聲效有視覺效果佢哋係開心嘅。而呢個活動並唔係無存在價值，但最值得用嘅時候唔係用佢黎做遊戲玩，而係需要宣傳射箭活動要有拍攝效果時用。

3. 射生果

   不要玩弄食物，同埋生果被射中係唔會爆開嘅，啲汁仲會整到成支箭污糟晒，係完全唔好玩嘅。

要有器材系列

呢兩個遊戲都需要有膠頭tag箭，因為相對安全，我曾經有學校係用膠頭tag箭上PE堂甚至初班。雖然係用膠頭tag箭，但發射線外有人都係唔準射，亦都需要統一企上發射線先可以搭箭發射，跟番正常規矩。留意番真係玩攻防箭archery tag時參與者必需戴頭盔，而且攻防箭用嘅弓只係得10磅頭，即係話基本上任何地方學射箭用嘅弓都重過佢，所以一定唔可以對住人射。

1. 射龍門

   無咗箭需要上靶嘅安全限制，目標係咩都得，我係拎班房入面啲檯凳做龍門黎射。

2. 擲彩虹

   場地必需要夠大，即使瞄上天射箭都唔會飛出街。大嘅球場就好合適，試過用場地中場個圈作為目標。

3. 盲人射箭

   射手戴上眼罩，由隊友或者partner提示射向邊。隊友唔可以講嘢，只可以用筆掂住射手持弓臂一邊隻手，引導佢把弓指嘅方向，而射手就要確保自己隻手追住支筆，模擬盲人射箭嘅瞄準方法。

   

   真實操作時發現呢個遊戲難度比想象中高，唔係蒙眼射手問題，反而係負責引導個隊友問題，因為好多人都冇乜方向感，完全唔知應該控制個射手指向邊個方向先會射得中。

上述部份遊戲最初係好多年前喺texasarchery.org網站搵到，但網站而家已經見唔到呢啲資料，要用wayback machine時光倒流返去2015年前先搵到。該網站仲有好多資料同記錄值得睇吓，係分類唔太清晰要時間慢慢搵吓，強烈建議得閒無嘢做事去遊覽吓。

如果大家有其他好玩嘅射箭遊戲諗法，請留言或者PM話我知，等我放埋喺度畀大家參巧吓。

吉卜力（射箭）Signal

吉卜力（射箭）Whatsapp

奧運射箭pictogram Signal

奧運射箭pictogram Whatsapp

[頭盔] 無check過咁用Olympics pictogram得唔得，二次創作應該無事掛？